Yjet e futbollit të pranishëm në funeralin e Diogo Jotës dhe vëllait të tij, mësohet kërkesa e familjes

Mijëra njerëz janë mbledhur këtë mëngjes në qytetin e Gondomarit për të marrë pjesë në funeralin e Diogo Jotës, futbollistit të Liverpoolit dhe kombëtares së Portugalisë, i cili humbi jetën së bashku me vëllain e tij, Andre Silva, në një aksident tragjik automobilistik.

Mbrojtësi i Manchester Cityt, Ruben Dias – bashkëlojtar i Jotës me kombëtaren portugeze – ka mbërritur në funeral, i veshur krejtësisht në të zeza dhe duke mbajtur një buqetë me trëndafila të bardhë në dorë.

Po ashtu, ish-shoku i skuadrës së Jotës te Wolves dhe Portugalia, Nelson Semedo, është parë në vendin e ceremonisë mortore.

Arkivolet e dy vëllezërve janë vendosur në një kishë në qytetin e tyre të lindjes, Gondomar.

Pak para orës 10:00 të mëngjesit, trupat do të dërgohen nga kapela në hyrjen kryesore të Kishës Parokiale të Gondomarit.

Ndërkohë që vetëm familjarët dhe miqtë e ngushtë do të lejohen brenda në kishë, ceremonia do të transmetohet me zë në ambientin e jashtëm për publikun e shumtë të pranishëm.

Dje, mijëra qytetarë kanë nderuar kujtimin e Jotës gjatë homazheve, duke vendosur lule dhe objekte përkujtimore në kapelën ku qëndroi trupi i tij.

Sot, shumë tifozë janë mbledhur jashtë kishës të veshur me fanella të ekipeve ku kanë luajtur dy vëllezërit – për t’i dhënë lamtumirën njërit prej futbollistëve më të dashur të Portugalisë.

Ndër të pranishmit ishte edhe agjenti i njohur Jorge Mendes, i cili mbërriti i veshur me kostum të zi dhe kravatë të zezë.

Kapiteni i Manchester Cityt dhe një tjetër bashkëlojtar i Jotës në kombëtare, Bernardo Silva, është parë gjithashtu jashtë kishës. Po ashtu, në ceremoni kanë mbërritur edhe ish-lojtarët e Liverpoolit, Fabinho dhe Thiago Alcantara.

Delegacioni i Liverpoolit ka hyrë në kishë duke mbajtur dy kurora lulesh në formë fanellash, me numrat 20 dhe 30 – njëra për Diogo Jotën dhe tjetra për vëllain e tij, Andre Silva.

Turma e pranishme jashtë ndërtesës shpërtheu në duartrokitje ndërsa ata hynë.

Ceremonia e sotme shënon një moment të dhimbshëm për familjen, miqtë, bashkëlojtarët dhe tifozët e Diogo Jotës – një futbollist që do të kujtohet jo vetëm për talentin e tij në fushë, por edhe për shpirtin dhe përulësinë që e karakterizonte.