Tifozët argjentinas valëvisin flamurin izraelit para trajnerit të Egjiptit, Hossam Hassan pështyn drejt tyre

Një video e krijuar pas ndeshjes së fazës së 1/8-tës së Kupës së Botës mes Argjentinës dhe Egjiptit është përhapur me shpejtësi në rrjetet sociale, duke shkaktuar reagime të shumta në mbarë botën.

Në pamje shfaqet një grup tifozësh argjentinas duke valëvitur flamurin izraelit, ndërsa trajneri i Egjiptit, Hossam Hassan, ndodhet afër tyre dhe shihet duke pështyrë në drejtim të tyre.

Në rrjetet sociale janë shfaqur pretendime se ky veprim ishte një provokim i qëllimshëm ndaj trajnerit egjiptian, për shkak të deklaratave të tij të mëparshme publike, në të cilat ai ka shprehur mbështetje për palestinezët dhe ka bërë thirrje që të mos harrohen viktimat civile të luftës në Gaza.

Megjithatë, deri tani nuk ka asnjë konfirmim zyrtar apo prova që dëshmojnë se tifozët kishin për qëllim ta provokonin Hassanin me flamujt e tyre. Motivi i veprimeve të tyre mbetet objekt interpretimesh të ndryshme në rrjetet sociale.

Hossam Hassan ka tërhequr vëmendjen ndërkombëtare ditët e fundit me deklaratat e tij lidhur me situatën në Gaza. Pas kualifikimit të Egjiptit në fazat eliminatore të Kupës së Botës, ai deklaroi se sukseset sportive nuk duhet të largojnë vëmendjen nga vuajtjet njerëzore dhe shprehu solidaritet me viktimat civile të konfliktit.

Gjatë një prej paraqitjeve të tij të mëparshme publike, ai mbante flamurin palestinez, veprim që shkaktoi reagime të shumta në publikun ndërkombëtar.

Pas humbjes 3-2 të Egjiptit ndaj Argjentinës dhe eliminimit nga Kupa e Botës, vëmendja e një pjese të publikut nuk u përqendrua vetëm te ngjarjet në fushë, por edhe te skenat në tribuna, pamjet e të cilave vazhdojnë të shpërndahen gjerësisht në internet.

Argjentina fitoi 3-2 dhe siguroi kalimin në çerekfinale të Kupës së Botës, ndërsa pamjet nga tribunat dhe interpretimet rreth tyre pritet të vazhdojnë të diskutohet edhe më tej.