Spalletti e çon në qiell Zhegrovën

Luciano Spalletti ka folur për cilësitë e Edon Zhegrovës, duke e vlerësuar talentin dhe aftësinë e sulmuesit për të krijuar probleme për mbrojtjet kundërshtare, por edhe duke theksuar rëndësinë e ekuilibrit taktik të skuadrës.

Trajneri italian ka nënvizuar se lëvizjet e Zhegrovës janë të paparashikueshme, një karakteristikë që e bën atë të rrezikshëm në duelet individuale dhe i jep mundësi të krijojë zgjidhje edhe në situata të vështira.

“Zhegrova ka aftësi të jetë shkatërrues për kundërshtarët, falë karakteristikave të tij dhe mënyrës se si luan. Lëvizjet e tij janë të paparashikueshme për kundërshtarët, por ndonjëherë janë të paparashikueshme edhe për vetë atë”, ka deklaruar Spalletti.

Tekniku italian ka shpjeguar se sulmuesi kosovar është i gatshëm të ndryshojë drejtimin dhe planet gjatë një aksioni, duke u përpjekur të gjejë zgjidhjen më të mirë, edhe kur situata nuk zhvillohet sipas parashikimeve.

Megjithatë, Spalletti ka vënë në dukje se kjo liri në lojë nuk përputhet gjithmonë me ekuilibrin taktik që kërkon skuadra. Sipas tij, përdorimi optimal i Zhegrovës varet edhe nga mënyra se si organizohet pjesa tjetër e ekipit.

“Ai mund të gjejë hapësirën e duhur në skuadër nëse arrijmë të vendosim ekuilibrin e duhur në krahun tjetër të fushës”, ka theksuar trajneri.

Në fund, Spalletti ka dhënë një vlerësim pozitiv për paraqitjet e Zhegrovës, duke lënë të kuptohet se anësori kosovar meriton më shumë mundësi për të dëshmuar veten në fushë.

“Duke u bazuar në atë që na ka treguar, Zhegrova do ta meritonte më shumë kohë loje”, ka përfunduar ai.