Në prag të sfidës ndaj Luksemburgut, trajneri i Kombëtares shqiptare, Rolando Maran, ka folur për gjendjen e skuadrës, lojtarët që mund të marrin më shumë hapësira dhe objektivat e stafit teknik për ndërtimin e ekipit në muajt e ardhshëm.
Tekniku italian vlerësoi eksperiencën e Elseid Hysajt, la të hapur mundësinë e ndryshimeve në formacion dhe theksoi se ndeshja do të shërbejë si një test i rëndësishëm për të ardhmen e kuqezinjve.
Maran u ndal fillimisht te rëndësia e grupit, duke shmangur fokusimin te individët, por veçoi kontributin e lojtarëve me përvojë si Elseid Hysaj.
“Preferoj të flas për skuadrën dhe jo për emra të veçantë. Megjithatë, Hysaj është një shembull i rëndësishëm për grupin. Numri i madh i ndeshjeve që ka zhvilluar me Kombëtaren dhe vazhdimësia e tij në performancë janë elementë që ndihmojnë rritjen e ekipit”, u shpreh trajneri.
Tekniku italian foli edhe për futbollistin e ri Hasa, për të cilin tha se po vlerësohet një rol më i avancuar në fushë, duke i dhënë më shumë liri në lëvizje dhe organizimin e lojës.
Sipas Maran, grumbullimi aktual dhe sfidat e ardhshme do të ndihmojnë stafin teknik të kuptojë më mirë karakteristikat e futbollistëve dhe mënyrën se si mund të zhvillohet skuadra në të ardhmen.