Juventusi e dënon Bremerin, kjo është arsyeja

Raportimet nga disa media italiane konfirmojnë se Juventusi ka marrë vendim ta gjobisë qendërmbrojtësin Gleison Bremer, pas kritikave të tij ndaj bashkëlojtarëve në intervistën pas ndeshjes, pas humbjes 3-0 në shtëpi ndaj Lazios të dielën në Serie A.

Ishte një mbrëmje e tmerrshme për Juventusin të dielën, pasi skuadra ra në vendin e tetë në tabelën e Serie A, duke pësuar tri gola në shtëpi pa arritur të shënojë asnjë. Pas vetëm shtatë ndeshjeve të sezonit, bardhezinjtë tashmë kanë tetë pikë më pak se liderët e kampionatit.

Kjo humbje bëri që disa tifozë të kërkonin largimin e Luciano Spallettit, ndërsa në tribuna pati edhe përplasje mes vetë tifozëve, të cilët nisën të rriheshin me njëri-tjetrin. Kjo ishte një pasqyrë e atmosferës së krijuar aktualisht rreth klubit.

Bremer, i cili po e mbante shiritin e kapitenit gjatë ndeshjeve në mungesë të Manuel Locatellit, tërhoqi gjithashtu vëmendjen me kritikat ndaj disa lojtarëve të Juventusit, pa i përmendur me emër, gjatë intervistës pas ndeshjes. Ai i akuzoi ata se po bëhen “frikacakë” dhe po “fshihen” në fushë.

“Është e vërtetë, trajneri na jep udhëzime, por jemi ne ata që duhet t’i zbatojmë ato në fushë”, deklaroi mbrojtësi i Juventusit pas përfundimit të ndeshjes të dielën.

“Megjithatë, në fushë janë 11 lojtarë, plus pesë të tjerë që hyjnë nga stoli, prandaj nuk mund t’i mbaj të gjithë mbi supe. Mundohem t’i ndihmoj, flas me ta, por secili ka karakterin e vet. Mund t’i shtyjmë deri në një pikë të caktuar, por kaq. Disa kanë më shumë karakter se të tjerët”, shtoi ai.

Sipas raportimit të gazetës italiane “Tuttosport” të martën në mëngjes, Bremer u ka kërkuar falje bashkëlojtarëve dhe është njoftuar se klubi do ta gjobisë për veprimet e tij. Reprezentuesi brazilian thuhet se e ka pranuar dënimin.

“Tuttosport” e përshkroi situatën si “elefantin në dhomë” kur Bremer u kthye të hënën në zhveshtoren e qendrës stërvitore të klubit në Continassa. Megjithatë, gazeta shton se mbrojtësi ishte i pari që e hapi këtë temë të pakëndshme, gjë që u vlerësua nga bashkëlojtarët e tij.