Infantino kërkon falje për gabimet, por mbetet president i FIFA

Presidenti i FIFA-s, Gianni Infantino, ka kërkuar falje për “gabimet” e bëra gjatë përpjekjes së diskutueshme për t’u shitur investitorëve privatë pjesë të të drejtave tregtare të kompeticioneve të organizuara nga FIFA. Megjithatë, ai do të vazhdojë të qëndrojë në krye të institucionit, pasi mori mbështetjen e drejtuesve të lartë në një mbledhje të zhvilluar në Rabat të Marokut.

Infantino mblodhi Bordin Drejtues në zyrën e FIFA-s për Afrikën të mërkurën, pas kritikave të forta që pasuan tërheqjen e planit të tij. Katër orë pas përfundimit të mbledhjes, FIFA publikoi një deklaratë ku rikonfirmoi mbështetjen për presidentin e saj.

UEFA kishte deklaruar fundjavën e kaluar se kishte humbur besimin te Infantino, duke e cilësuar propozimin për krijimin e kompanisë FIFA Forward Enterprise (FFE) si një “marrëveshje të errët, të zhvilluar prapa dyerve të mbyllura dhe pa transparencë”.

Kritikat nuk erdhën vetëm nga jashtë. Edhe sekretari i përgjithshëm i FIFA-s, Mattias Grafström, në një memorandum të brendshëm drejtuar stafit, e përshkroi situatën si “një seri ngjarjesh të trishtueshme dhe të dënueshme”. Megjithatë, pas mbledhjes ai dhe anëtarët e Bordit Drejtues deklaruan se i japin “mbështetje të plotë” Infantinos.

Sipas BBC-së, Infantino dhe Grafström u kanë dërguar gjithashtu një letër zëvendëspresidentëve të FIFA-s, Këshillit të FIFA-s dhe 211 federatave anëtare, ku kërkojnë sinqerisht falje për gabimet dhe zotohen se ato nuk do të përsëriten.

Çfarë ishte plani i diskutueshëm?

Infantino kishte propozuar krijimin e kompanisë së re FIFA Forward Enterprise (FFE), përmes së cilës investitorë privatë do të blinin pjesë të të drejtave tregtare të turneve të FIFA-s, përfshirë Kupën e Botës për meshkuj dhe femra.

Në këmbim të mbështetjes së federatave, FIFA kishte ofruar një grant prej 40 milionë dollarësh për secilën prej tyre.

Në deklaratën zyrtare, FIFA pranoi se gjatë procesit ishin bërë gabime dhe se federatat anëtare dhe Këshilli i FIFA-s nuk duhej të ishin ndier të përjashtuara nga vendimmarrja. Po ashtu, organizata pranoi se pati gabime edhe në mënyrën si u menaxhua situata pasi plani u zbulua në media.

Megjithatë, FIFA theksoi se nuk do të tolerojë sulme ndaj integritetit dhe reputacionit të saj dhe se do të ndërmarrë të gjitha masat e nevojshme për ta mbrojtur atë.

Mohimi për finalen e Botërorit 2030

Më herët, FIFA hodhi poshtë një raportim të gazetës The Times, sipas të cilit Infantino i kishte premtuar Marokut organizimin e finales së Kupës së Botës 2030 në këmbim të mbështetjes politike.

Sipas FIFA-s, pretendimi është “i rremë dhe mashtrues”, ndërsa vendimi për stadiumin ku do të zhvillohet finalja e turneut, që do të organizohet nga Spanja, Portugalia dhe Maroku, do të merret në një fazë të mëvonshme.

Kritikat vazhdojnë

Edhe pse ka marrë mbështetjen e drejtuesve të FIFA-s, Infantino vazhdon të përballet me kritika.

Kryeministri kanadez Mark Carney deklaroi se nuk ka më besim te presidenti i FIFA-s, ndërsa ish-legjenda e Portugalisë, Luis Figo, i kërkoi atij të japë dorëheqjen menjëherë.

“Infantino e ka ulur dinjitetin e postit që kishte premtuar ta ngrinte. Është vonë për të shpëtuar dinjitetin e tij, por jo për të shpëtuar futbollin”, deklaroi Figo.

Megjithatë, 56-vjeçari pritet të kandidojë për një mandat të katërt në zgjedhjet që do të mbahen gjatë Kongresit të FIFA-s në Marok në mars të vitit 2027. Kandidatët kanë afat deri më 18 nëntor për të paraqitur kandidaturën, ndërsa fituesi duhet të sigurojë të paktën 106 vota nga 211 federatat anëtare.

A mund ta rrëzojë UEFA?

UEFA ka qenë kundërshtari më i fortë i Infantinos gjatë kësaj krize. Pas refuzimit të planit FFE, konfederata europiane kërcënoi edhe me veprime ligjore ndaj FIFA-s dhe disa federata, mes tyre Uellsi, kanë tërhequr mbështetjen për rizgjedhjen e tij.

Megjithatë, ndikimi i UEFA-s nuk mjafton për ta rrëzuar Infantinon pa mbështetjen e konfederatave të tjera.

Deri tani, vetëm CONCACAF ka shprehur kritika ndaj presidentit të FIFA-s, por pa deklaruar se ka humbur besimin tek ai. Ndërkohë, konfederatat e Azisë dhe Afrikës nuk kanë ndërmarrë hapa të ngjashëm.

Përkundrazi, vende si Egjipti, Maroku, Nigjeri, Mauritania, Republika Demokratike e Kongos dhe Filipinet kanë rikonfirmuar mbështetjen për Infantinon. Shumë prej tyre kanë përfituar fonde të konsiderueshme nga programi FIFA Forward, që u ka siguruar rreth 8 milionë dollarë në çdo cikël trevjeçar.

Kjo e bën shumë të vështirë për UEFA-n të krijojë një shumicë globale kundër presidentit aktual të FIFA-s.

Si mund ta rikuperojë situatën Infantino?

Kontroversa e fundit konsiderohet si sfida më serioze e dhjetë viteve të Infantinos në krye të FIFA-s.

Sipas kritikëve, problemi nuk ishte vetëm ideja për t’u shitur investitorëve privatë një pjesë te të drejtave tregtare të Kupës së Botës, por edhe mungesa e transparencës gjatë procesit. Polemikat u shtuan edhe nga fakti se një nga përfituesit e mundshëm të marrëveshjes do të ishte Joshua Kushner, vëllai i Jared Kushner, dhëndrit të presidentit amerikan Donald Trump.

Skandali solli edhe dorëheqjen e Carlos Cordeiro, këshilltarit të lartë të Infantinos për strategjinë globale dhe qeverisjen, ndërsa drejtues të tjerë të rëndësishëm, si Arsène Wenger dhe Kevin Lamour, zgjodhën të qëndrojnë në detyrë, megjithëse kishin shprehur rezerva.

Për të rikthyer besimin, Infantino mund të detyrohet të propozojë reforma të reja në mënyrën e qeverisjes së FIFA-s, duke vendosur mekanizma më të fortë kontrolli dhe transparence, në mënyrë që një situatë e ngjashme të mos përsëritet.