Florent Muslija ka pësuar lëndim të rëndë me Fortuna Dusseldorfin

Florent Muslija ka pësuar një lëndim serioz mbrëmjen e së premtes, duke ngritur shqetësime të mëdha te Fortuna Düsseldorf.

Në ndeshjen e vlefshme për javën e 29-të të Bundesliga 2, të cilën Düsseldorf e humbi në shtëpi me rezultat 2-1 ndaj Holstein Kiel, reprezentuesi i Kosovës qëndroi në fushë deri në minutën e 65-të.

Sipas raportimeve të Bild , tre lojtarë të Düsseldorf u larguan nga loja për shkak të lëndimeve, ndërsa më shqetësuesi ishte rasti i Muslijës.

Ylli kosovar u pa në lot duke mbajtur gjurin e këmbës së djathtë, duke sinjalizuar një dëmtim potencialisht të rëndë.

“Ylli Muslija në lot po e shtrëngonte gjurin e këmbës së djathtë dhe, në skenarin më të keq, ai mund të mbetet jashtë fushave deri në fund të sezonit”, shkruan Bild .

Ky zhvillim vjen në një moment delikat për Fortuna Düsseldorf, që aktualisht renditet në vendin e 13-të me 31 pikë dhe po lufton për të siguruar mbijetesën në ligë.

Mungesa e mundshme afatgjatë e Florent Muslija do të ishte një goditje e madhe për skuadrën gjermane në fazën vendimtare të sezonit.