Edon Zhegrova rikthehet në Basel: Ky klub ishte një kapitull shumë i rëndësishëm në karrierën time!

Edon Zhegrova do të rikthehet në St. Jakob-Park, aty ku shkroi një pjesë të rëndësishme të karrierës së tij, por këtë herë si kundërshtar i Baselit me fanellën e Juventusit.

Reprezentuesi i Kosovës pritet të jetë pjesë e miqësores mes Juventusit dhe FC Basel 1893, ndërsa klubi zviceran ka publikuar një intervistë me sulmuesin kosovar, i cili ka folur për periudhën e kaluar te Baseli, zhvillimin e tij dhe emocionet e rikthimit në ish-stadiumin e tij.

Pas aventurës te Baseli, Zhegrova u transferua te LOSC Lille, ku në 107 ndeshje zyrtare shënoi 26 gola dhe regjistroi 18 asistime, ndërsa më pas kaloi te Juventusi.

Duke folur për rikthimin në “St. Jakob-Park”, Zhegrova tha se kjo do të jetë një përvojë e veçantë.

“Absolutisht. Bazeli ishte një kapitull shumë i rëndësishëm në karrierën time. Për këtë arsye, do të jetë diçka speciale të luaj përsëri në St. Jakob-Park. Kam shumë kujtime të bukura me klubin, qytetin dhe tifozët. Do të jetë kënaqësi të shoh përsëri fytyra të njohura.”

Zhegrova kujtoi me nostalgji kohën e kaluar në Zvicër, duke theksuar se aty u zhvillua si futbollist dhe si person.

“Mendoj kryesisht për një periudhë ku pata mundësinë të zhvillohesha më tej si lojtar dhe si person. Mësova shumë këtu dhe bëra hapa të rëndësishëm. Atmosfera në stadium ishte gjithmonë e veçantë dhe tifozët më mbështetën që nga fillimi.”

Ylli kosovar tha se vazhdon ta ndjekë rrugëtimin e Baselit dhe është i lumtur për sukseset e fundit të klubit.

“Kur një klub ka qenë kaq i rëndësishëm për karrierën tënde, natyrshëm e ndjek atë që ndodh aty. Jam i kënaqur që Bazeli ka fituar përsëri tituj. Klubi i përket majës dhe e di sa shumë do të thotë kjo për tifozët.”

Duke folur për zhvillimin e tij që nga largimi nga Baseli, Zhegrova theksoi se sot ndihet një lojtar më i kompletuar.

“Besoj se sot jam një lojtar më i pjekur dhe më i kompletuar. Në të kaluarën mbështetesha shumë te kreativiteti dhe talenti im, por me kalimin e kohës kam mësuar rëndësinë e disiplinës, qëndrueshmërisë dhe marrjes së vendimeve të duhura në momentet vendimtare.”

Për sezonin e ri, objektivi i tij është i qartë: të jetë i shëndetshëm dhe të ndihmojë ekipin.

“Gjëja më e rëndësishme është të qëndroj i shëndetshëm dhe të ndihmoj ekipin. Dua të përmirësohem çdo ditë dhe të kontribuoj me gola, asistime dhe punë të palodhur. Në fund, më e rëndësishmja është suksesi i ekipit.”

Rikthimi i Zhegrovës në Basel pritet të jetë një moment i veçantë për tifozët zviceranë, të cilët do ta shohin për herë të parë ish-yllin e tyre në krahun kundërshtar.