Dy futbollistët e rinj kanë shprehur emocionet dhe motivimin e tyre pas ftesës për herë të parë në Kombëtaren e Kosovës, në kuadër të përgatitjeve për ndeshjet miqësore.
Në prononcimin për Federatën e Futbollit të Kosovës, Matoshi dhe Nivokazi deklaruan se janë pritur jashtëzakonisht mirë nga bashkëlojtarët dhe stafi teknik.
Lojtari, Valmir Matoshi, theksoi gjithashtu se është i lumtur për këtë hap të rëndësishëm në karrierën e tij, duke theksuar se do të japë maksimumin për fanellën e Kosovës dhe do të mundohet ta shfrytëzojë këtë mundësi në mënyrën më të mirë të mundshme, duke treguar se, pavarësisht se është hera e parë që ftohet nga Kosova, ndihet sikur ka kohë të gjatë që është pjesë e ekipit.
“Është një ndjenjë shumë e mirë, të cilën nuk e kisha përjetuar deri tash. Të gjithë lojtarët janë shumë të mirë, po ashtu edhe stafi i trajnerëve. Bisedojmë lirshëm me njëri-tjetrin, ashtu siç duhet të jetë.Po më duket sikur kam luajtur për kohë të gjatë për Kosovën. Më vjen mirë prej të gjithëve për pritjen” – ka thënë Matoshi.
Ndërkohë, Matoshi, tregoi se i ka ndjekur vazhdimisht “Dardanët” dhe së është ndier i zhgënjyer që ata nuk arritën të kualifikohen në Kampionatin Botëror.
“Thuajse të gjitha ndeshjet e Kosovës i kam shikuar më herët. E kam parë edhe ndeshjen e fundit kualifikuese ku ishte afër kualifikimit në Botëror. Do të ishte mirë, por nuk u bë” – deklaroi Matoshi.