Dinamo bie nga froni, Prishtina e Re merr kreun, Liria i vihet pas – Rezultatet dhe tabela pas xhiros së 10-të në Ligën e Parë

Ka përfunduar java e 10-të në Raiffeisen Ligën e Parë të Kosovës, ku nuk kanë munguar rezultatet interesante dhe ndryshimet në renditjen tabelare.

Rezultatin më të thellë të kësaj jave e regjistroi Ferizaj, që triumfoi me rezultat 4-1 ndaj Dinamos, duke marrë tri pikë të rëndësishme në garën për pozitat e kreut, dhe duke i rrëzuar nga froni rivalin lokal

Ndërkohë, Prishtina e Re fitoi si mysafire ndaj Kikës me rezultat 1-0 dhe pas gabimit të Dinamos, kryeqytetasit marrin kreun.

Fitore të vlefshme shënoi edhe Liria, e cila mposhti Trepçën me rezultat minimal 1-0.

Suhareka ishte bindëse në përballjen me Tefik Çangën, duke triumfuar 3-0, ndërsa 2 Korriku e mposhti Istogun me rezultat 1-0.

Tri ndeshje të tjera përfunduan në barazim. Lepenci dhe Besa Peja ndanë pikët pas rezultatit 2-2, ndërsa Ramiz Sadiku dhe Vjosa barazuan 1-1, rezultat ky që u përsërit edhe në duelin mes Rilindjes 1974 dhe Vëllaznimit.

Në ndeshjen mes Mitrovicës dhe Trepçës ’89 nuk pati gola, me të dyja skuadrat që u desh të kënaqeshin me nga një pikë.

Sa i përket renditjes tabelare, Prishtina e Re tashmë wshtw lidere e re me 21 pikë nga 10 ndeshje të zhvilluara. Pas saj renditet Liria me 20 pikë, por me një ndeshje më pak, ndërsa Dinamo mban vendin e tretë me 19 pikë.

Në pozitën e katërt gjendet Rilindja 1974 me 18 pikë, e ndjekur nga Trepça ’89 me 17 pikë. Suhareka dhe Ferizaj kanë nga 16 pikë, ndërsa 2 Korriku renditet i teti me 15 pikë.

Në pjesën e poshtme të tabelës, Mitrovica ka pesë pikë, ndërsa Tefik Çanga mbetet në pozitën e fundit me vetëm tri pikë pas 10 ndeshjeve të zhvilluara.