Fisnik Asllani ishte marrë vesh për çdo detaj me Leipzigun, por transferimi i tij ka dështuar pas problemeve të evidentuara gjatë kontrolleve mjekësore.
Sulmuesi 24-vjeçar i Hoffenheimit nuk do të transferohet te Leipzigu, pasi rezultatet e ekzaminimeve mjekësore bënë që marrëveshja të ndërpritej.
Marrëveshja parashikonte një investim prej 25 milionë eurosh, shumë që mund të shkonte deri në 30 milionë euro me bonuse, si dhe një kontratë deri në vitin 2031. Tashmë, marrëveshja është anuluar, duke rikthyer në skenë klubet e interesuara për përfaqësuesin kosovar.
Hoffenheimi i ka dalë në krah futbollistit, të cilin e ka në dispozicion dhe nuk pritet ta lejojë largimin e tij për një shumë më të ulët se 25 milionë eurot që kishte ofruar Leipzigu.
Në garë për sulmuesin shtatlartë janë Barcelona, Borussia Dortmundi dhe Tottenhami.
Gjiganti katalanas e ka ndjekur Asllanin gjatë gjithë afatit kalimtar të verës.
Interesimi i “Blaugranëve” ishte i lidhur edhe me operacione të tjera për përforcimin e repartit ofensiv, por tani Asllani është rikthyer në tavolinë pas prishjes së marrëveshjes me Leipzigun.
Barcelona ka mbetur pa sulmuesin Robert Lewandowski, i cili përfundoi në ligën MLS, ndërsa edhe Ferran Torres pritet të transferohet në Paris Saint-Germain.