Sot nis peticioni për shkarkimin e kryetarëve në Mitrovicën e Veriut e Leposaviq

Duke filluar nga ora 09:00 sot pritet të nis mbledhja e nënshkrimeve në kuadër të peticionit për shkarkimin e kryetarit të Mitrovicës Veriore Erden Atiq, dhe atij të Leposaviqit, Lulzim Hetemi.

Ky peticion është i organizuar nga grupi iniciatorë serb.

Këtë e ka konfirmuar kryesuesi i Kuvendit Komunal në veri të Mitrovicës, Nexhat Uglijani.

“Ne përmes emalit i kemi dërgu grupit iniciues dhe Ministrisë së Pushtetit Lokal pëlqimin për shfrytëzimin e objektit, hapësirën publike e cila gjendet te Salla e Sporteve në Pjesën Veriore. Ata (grupi iniciatorë serb) sot fillojnë prej orës 09:00. Fillon në pjesën Veriore dhe Leposaviq”- ka thënë ai.

Atiq e Hetemi u zgjodhën kryetar në Mitrovicë të Veriut dhe Leposaviq në prill të vitit të kaluar në zgjedhjet që u mbajtën në katër komunat veriore të Kosovës.

Zgjedhjet e 23 prillit në të cilat katër komunat – Mitrovicë e Veriut, Zubin Potok, Zveçan e Leposaviq – u fituan nga kryetar shqiptarë, u bojkotuan nga Lista Serbe.