Magjistralja Prishtinë-Podujevë ka qenë sot cak i dy aksidenteve. Të dy këto ndodhën brenda ditës, e ku njëri prej tyre përfundoi me fatalitet. Në mesin e të aksidentuarve pati edhe mërgimtarë e fëmijë.
Një aksident i rëndë ndodhi qysh në orët e para të mëngjesit, aksident ky që ua mori jetën dy personave. Këta të fundit u ndeshën me një autobus.
Viktimat ishin një 35-vjeçare me inicialet M.S dhe një 36-vjeçar me inicialet Sh.S, derisa të lënduar mbetën dy fëmijët e tyre, gjendja e të cilëve raportohet të jetë stabile.
“Rreth orës 04:40 kemi pranuar informatën se në rrugën Prishtinë – Podujevë, ka ndodhur një aksident trafiku me pasoja fatale. Në këtë aksident kanë qenë të përfshira, një veturë (me targa të huaja) e cila ka qenë në lëvizje dhe një autobus. Si pasojë e aksidentit lëndime të rënda trupore kanë pësuar katër persona, dy prej tyre nuk kanë arritë të përballojnë plagët dhe të njëjtit kanë ndërruar jetë”, konfirmoi Policia e Kosovës për Demos.
Dhimbja ishte edhe më e madhe kur u kuptua se dy të vdekurit në aksident ishin mërgimtarë, e që kishin ardhur në Kosovë për pushime.
Familjarët e viktimave tashmë kanë hapur dyert për “të pame” e po presin njerëz.
Babai i 36 vjecarit që vdiq sot tregoi se si e mori lajmin e kobshëm.
“Prej orës 3, ata tjerët janë shku atje, unë kam ndejtë me ta, e s’më kanë kallxu. Dy, tha, janë shku [kanë vdekur] e kush është shku s’kallxojshin”, tha Sopaj për T7.
Sopaj tregoi se fillimisht atij iu tha se është bërë një ndeshje e vogël dhe nuk e dinte se ai aksident i kishte marrë jetën djalit dhe rejës së tij.
“Policia na dha lajmin, e Malisheves, dy parë dyer i kem çelur, në mëngjes, edhe ato poshtë edhe këto lart. Ata thanë një ndeshje e vogël u bë ashtu-kështu, pastaj me kerr kam shku menjëherë”, thotë ai.
Ai tutje tregoi se i biri i tij kishte shkuar jashtë vendit para 15 viteve, në moshë të re.
Ndërkaq, një aksident tjetër i rëndë ka ndodhur po ashtu në magjistralen Prishtinë-Podujevë.
Një veturë dhe një motoçikletë janë ndeshur mes veti, ku u raportua për tre persona të lënduar.
Të njëjtit janë dërguar për tretman mjekësor derisa ende nuk dihet për gjendjen e tyre shëndetësore përveç se janë jashtë rrezikut për jetë.
“Sot rreth orës 14:00 ne rrugën Prishtinë – Podujevë, saktësisht në fshatin Vranidoll, ka ndodhur një aksident trafiku në mes të një automjeti dhe një motoçiklete. Si pasojë e aksidentit tre persona kanë pësuar lëndime trupore. Të njëjtit janë dërguar për tretman mjekësor”, ka thënë Zëdhënësja e Policisë për Rajonin e Prishtinës, Flora Ahmeti.
Çështja e pasigurisë në këtë magjistrale u bë edhe temë diskutimi sot në Kuvend.
Deputetja e PDK-së, Ganimete Musliu, tha se kjo magjistrale është bërë rrugë e vdekjes, prandaj ministri i Infrastrukturës, Liburn Aliu, duhet të dalë në terren dhe të sinjalizojë
“Apeloj ministrin Liburn Aliu dhe të gjithë stafin që të dalin në teren dhe të sinjalizojë urgjentisht rrugën Podujevë-Prishtinë, e cila është bërë rrugë e vdekjes. Sot kur po flasim ne i kemi humbur dy mërgimtarë tanë në atë rrugë, vetëm në mungesë të sinjalizimit të rrugëve. Është e dhimbshme, është tragjike që qytetarët tanë të kalojnë mijëra kilometra për t’i kaluar pushimet dhe të humbin jetën në aksin rrugor Podujevë-Prishtinë, pak kilometra para se të mbërrijnë në familjet e tyre”, theksoi ajo.