Vajzat dhe gratë po vazhdojnë të jenë viktimat më të shpeshta të dhunës në familje, ngacmimeve e sulmeve seksuale. Në shumë raste, viktima janë të miturat, të cilat keqpërdoren seksualisht nga persona të rritur, e shumë herë edhe të moshuar.
Një rast i tmerrshëm dyshohet të ketë ndodhur sot në rrugën “Avdi Kelmendi” në Lipjan, ku një person po dyshohet se ka ngacmuar seksualisht një nxënëse.
Burimet e Sinjalit kanë bërë me dije se rasti dyshohet se ka ndodhur teksa e mitura ishte duke pritur autobusin, kur i dyshuari, i moshës 55-vjeçare i është afruar dhe ka filluar ta ngacmojë.
Në bazë të informacioneve të para, i dyshuari e ka ftuar viktimën që të shkojë me të në veturë, por nxënësja ka refuzuar dhe më pas ai ka ikur.
Si rezultat i denoncimit, mësohet se i dyshuari është identifikuar, por akoma nuk është arrestuar.
Lidhur me rastin, Prokurori i Shtetit ka urdhëruar inicimin e rastit dhe ndërmarrjen e veprimeve të nevojshme për ta siguruar prezencën e të dyshuarit.