Nëse Kushtetuesja ua merr mandatet 120 deputetëve aktual, NISMA do të tkurrej në veç 2 deputetë, AAK-së i shtohet i gjashti

Kosova nga mesnata e së dielës ka hyrë në bllokadë Kushtetuese. Pas 54 tentativave, deputetët e dalë nga zgjedhjet e 9 shkurtit nuk arritën që ta konstituojnë legjislaturën e nëntë të Kuvendit të Kosovës, përkundër e Gjykata Kushtetuese u kishte caktuar atyre së fundi 30 ditë afat. 

Tashmë të zgjedhurit e popullit, me njoftimin e së premtes të Gjykatës Kushtetuese, deri më 8 gusht 2025 nuk kanë të drejtë të ndërmarrin ndonjë veprim pas shterjes së 30 ditëshit.

Përderisa vendi është në pritje të një vendimi të ri të Gjykatës Kushtetuese, për rastin e iniciuar nga PDK e LDK, po vazhdojnë aludimet mbi “pasojat” që mund të sjellë Kushtetuesja për bllokadën e krijuar, që do të çonte në dalje nga kriza institucionale tash e disa mujore.

Nga njohës të çështjeve kushtetuese, është aluduar se një vendim i mundshëm i Gjykatës, pos çuarjes së vendit në zgjedhje të reja, mund të jetë edhe marrja e mandati të deputetëve të certifikuar nga KQZ dhe zëvendësimi i tyre me emrat pasues në listat e partive politike që garuan në zgjedhjet e 9 shkurtit.

Nëse një vendim i tillë i supozuar mund të vinte pas 8 gushtit, një ndryshim që do të mund të krijonte situatë të re politike do të sillte përbërja e re e Grupi Parlamentar AAK-NISMA. Kjo pasi partia e Fatmir Limajt nga 3 deputetë aktual sa ka tash, do të tkurrej në dy, shkruan gazeta online Reporteri.net.

Në rast se Ramush Haradinajt, Daut Haradinajt, Lahi Brahimajt, Time Kadriajt, Bekë Berishës, Fatmir Limajt, Xhevahire Izmakut edhe Arbëreshë Krasniqit, do t’u merreshin mandatet, ata do të zëvendësoheshin nga Vesel Krasniqi, Ardian Gjini, Arbër Tolaj, Gani Bajraktaraj, Besnik Tahiri, Albana Bytyqi, Teuta Haxhiu e Diellza Kukaj.

Nga kjo përbërje, vetëm Krasniqi e Bajraktaraj vijnë nga NISMA, gjashtë të tjerët janë të AAK-së së Ramush Haradinajt. Por, situata me numrat e NISMA’s në Kuvend mund të ndryshojë pas disa muajsh, në rast se Ardian Gjini do të rizgjidhej kryetar i Gjakovës, që rrjedhimisht nënkupton lirimin e karriges në parlament. Ai do të pasohej nga Endrit Shala i NISMA’s, duke e rritur partinë e Limajt sërish në 3 deputetët, sa i ka aktualisht.

Përbërja me 3 deputetë, NISMA’s i ka mundësuar “pazarin” me VV-në që rezultoi i pasuksesshëm, meqë nuk arritën marrëveshje për emrin e kryeparlamentarit që partia e Fatmir Limajt insistonte në emrin e shefit të tyre, derisa LVV-ja në atë të Albulena Haxhiut.

Koalicioni AAK-NISMA, i shpërbërë tashmë, më 9 shkurt i fitoi 8 mandate gjithsej, që aktualisht i ndajnë 5 AAK-ja, 3 NISMA.