Izraeli ka thënë se Abu Obeida, zëdhënësi i krahut të armatosur të Hamasit, është vrarë në një sulm ajror në Qytetin e Gazës.
Ministri i Mbrojtjes i Izraelit, Israel Katz, përgëzoi Forcat e Mbrojtjes të Izraelit (IDF) dhe agjencinë e sigurisë së Izraelit, Shin Bet, për “ekzekutimin e përsosur” në një postim në X, shkruajnë mediat e huaja.
Ai nuk dha detaje mbi kohën ose vendndodhjen e operacionit, por IDF më parë tha se avionët e saj sulmuan “një terrorist kyç” në lagjen al-Rimal të shtunën, duke nxitur raportime në mediat izraelite se Obeida kishte qenë shënjestra.
Hamasi nuk e ka konfirmuar vdekjen e tij. Grupi i armatosur palestinez më parë tha se dhjetëra civilë u vranë dhe u plagosën në sulmet izraelite në një ndërtesë banimi në lagje.
Katz paralajmëroi të dielën se shumë të tjerë nga “partnerët kriminelë” të Obeidës do të jenë në shënjestër të “intensifikimit të fushatës në Gaza” – një referencë për një plan izraelit të miratuar së fundmi për të marrë kontrollin e Qytetit të Gazës.
Ndërkohë, veçmas, IDF dhe Shin Bet ofruan më shumë detaje rreth sulmeve të së shtunës që shënjestruan zëdhënësin e Hamasit.
Ata thanë në një deklaratë të përbashkët se operacioni ishte “bërë i mundur për shkak të inteligjencës paraprake të mbledhur nga [Shin Bet] dhe Drejtoria e Inteligjencës e IDF-së” që kishte identifikuar vendin e tij të fshehjes.
Obeida ishte ndër të paktët anëtarë të lartë të mbetur të krahut ushtarak të Hamasit që nga sulmi i tij vdekjeprurës i 7 tetorit 2023 në Izraelin jugor.
