Veset e princit Andrew s’kanë të ndalur, dyshohet për shpërdorime fondesh gjatë kryerjes së detyrës

Princi Andrew, i njohur edhe si Andrew Mountbatten-Windsor, akuzohet nga ish-nëpunës civilë se ka faturuar taksapaguesit britanikë për shërbime masazhi dhe udhëtime të tepërta gjatë kohës kur shërbeu si i dërguar tregtar i Mbretërisë së Bashkuar në periudhën 2001–2011.

Sipas raportimit të BBC, një ish-zyrtar i Departamentit të Tregtisë, i cili ka kërkuar të mbetet anonim, ka deklaruar se kishte kundërshtuar pagesën e një fature për “shërbime masazhi” pas një vizite zyrtare të Princit Andrew në Lindjen e Mesme. Megjithatë, ai thotë se kjo u tejkalua nga eprorët dhe shpenzimi u miratua.

“E mendova se ishte e gabuar… Thashë që nuk duhej paguar, por përfundimisht u pagua”, është shprehur ai për BBC-në, duke shtuar se në atë kohë duhej të ishte ngritur një “flamur i kuq” për mënyrën e sjelljes dhe shpenzimeve. Një tjetër ish-zyrtar i lartë i Whitehall-it ka mbështetur këto pretendime, duke thënë se kishte parë shpenzime të ngjashme. Sipas tij, gjatë vizitave zyrtare kishte shpenzime të konsiderueshme për fluturime, dhoma hoteli dhe shoqërues, shpesh pa kontroll të mjaftueshëm financiar.

Roli i princit Andrew si përfaqësues tregtar ishte i papaguar, por ai përfitonte mbështetje nga nëpunësit civilë dhe fondet publike për udhëtimet jashtë vendit. Departamenti për Biznes dhe Tregti nuk i ka kundërshtuar drejtpërdrejt pretendimet lidhur me periudhën e tij si i dërguar, por ka theksuar se ekziston një hetim policor në vazhdim lidhur me çështje të tjera.

Prince Andrew ka mohuar vazhdimisht çdo keqbërje në lidhje me marrëdhëniet e tij me financierin e dënuar për abuzime seksuale Jeffrey Epstein dhe ka deklaruar se nuk ka përfituar personalisht nga roli i tij si i dërguar tregtar në SHBA.

BBC-ja thekson se nuk ka parë prova të drejtpërdrejta për faturat e masazhit të para më shumë se 20 viteve, por se ka deklarata që mbështesin tezën e shpenzimeve të pamenduara mirë.

Ndërkaq, deputetë të Komisionit për Biznes dhe Tregti pritet të diskutojnë mundësinë e nisjes së një hetimi mbi rolin dhe përgjegjshmërinë e të dërguarve tregtarë. Ish-zyrtarë të tjerë kanë deklaruar se, ndonëse Princi Andrew ndonjëherë mund të ishte i këndshëm në takime, ai shpesh konsiderohej “problem”, për shkak të sjelljes së papërshtatshme dhe mungesës së disiplinës në vizitat zyrtare, duke rrezikuar të dëmtonte përpjekjet për promovimin e tregtisë britanike.

Çështja pritet të vazhdojë të tërheqë vëmendje publike, sidomos në kontekstin e debatit më të gjerë mbi transparencën dhe përdorimin e fondeve publike.