Ursula von der Leyen: BE dhe Japonia do të adresojnë praktikat e padrejta tregtare

Presidentja e Komisionit Evropian, Ursula von der Leyen, ka njoftuar se Bashkimi Evropian dhe Japonia do të forcojnë bashkëpunimin e tyre në mënyrë që të adresojnë çështje të tilla si detyrimi ekonomik dhe praktikat e padrejta tregtare.

Ajo ka bërë këto komente pas zhvillimit të samitit të përbashkët Japonia-BE, në të cilin ka marrë pjesë edhe kryeministri japonez, Shigeru Ishiba.

Ky samit ka ndodhur ndërkohë që Bashkimi Evropian po përballet me vështirësi në arritjen e një marrëveshje tregtare me Shtetet e Bashkuara të Amerikës, një ditë para një takimi të mundshëm me liderët e Kinës.

Japonia kishte nënshkruar një marrëveshje tregtare me SHBA-në disa ditë më parë, ku u rënë dakord për uljen e tarifave të importit të automjeteve nga 25% në 15%, në këmbim të më shumë investimeve në tregun amerikan.

Von der Leyen theksoi se Bashkimi Evropian dhe Japonia do të angazhohen për konsolidimin e sigurisë ekonomike dhe do të punojnë së bashku për të adresuar çështje si detyrimi ekonomik dhe praktikat e padrejta tregtare.

Ajo e theksoi gjithashtu se BE-ja beson në konkurrencën globale dhe se duhet të përfitojnë të gjithë prej saj.

Nga ana e tij, Ishiba ka deklaruar se Japonia dhe BE-ja janë angazhuar për të ndërtuar dhe mbajtur një rend ekonomik të bazuar në rregulla, që është njëkohësisht i lirë dhe i drejtë. Ai ka shtuar se të dyja palët janë dakorduar të thellojnë bashkëpunimin e tyre edhe në sektorin e mbrojtjes.