Në kënetat e Floridës, të populluara nga aligatorë, krokodilë dhe gjarpërinj, është ngritur një qendër e re burgimi për emigrantët ilegalë, e quajtur “Alkatrazi i Aligatorëve”.
Bëhet fjalë për një burg që mund të presë deri në 5 mijë persona dhe që, sipas vlerësimeve të mediave amerikane, do të kushtojë 450 milionë dollarë në vit.
Teknikisht bëhet fjalë për një vend qëndrimi në pritje të dëbimit, por që, sikurse ka njoftuar komandanti i përgjithshëm, mund të jetë më i ashpër se Alkatrazi origjinal.
Prej kohësh Trump ka hedhur idenë për të riparuar burgun e sigurisë së lartë në gjirin e San Franciskos për ta kthyer në qendër për burgimin e emigrantëve, sikurse ka ndodhur në Guantanamo.
Por për momentin do t’i duhet të kënaqet me strukturën e ngritur në kohë rekord nga ish-kundërshtari i tij, guvernatori i Floridës, Ron DeSantis.