Të paktën 42 emigrantë të zhdukur pasi një anije u përmbyt në brigjet e Libisë

Të paktën 42 emigrantë rezultojnë të zhdukur dhe mendohet se kanë vdekur pasi një barkë gome u përmbyt në brigjet e Libisë, ka bërë të ditur të mërkurën Organizata Ndërkombëtare për Migracionin (IOM).

Autoritetet libiane shpëtuan shtatë të mbijetuar që kishin lundruar në det për gjashtë ditë pasi anija me 49 emigrantë u përmbyt pranë fushës së naftës në Al Buri.

“Tragjikisht, 42 individë mbeten të zhdukur dhe supozohen të vdekur, përfshirë 29 nga Sudani, tetë nga Somalia, tre nga Kameruni dhe dy nga Nigeria”, tha Organizata Ndërkombëtare për Migracionin e OKB-së në një deklaratë.

Libia, e ndarë në dy pjesë që nga shpërthimi i luftës civile në vitin 2011 pas rrëzimit të diktatorit Muamar Gadafi, është bërë një pikë kryesore zbarkimi për migrantët nga e gjithë Afrika dhe Lindja e Mesme që përpiqen të arrijnë në Evropë me anije të vogla.

Ndërkohë, IOM e OKB-së ka bërë të ditur se vetëm që nga fillimi i vitit 2025, të paktën 527 emigrantë kanë humbur jetën në brigjet e Libisë.