“S’më intereson çka tha ajo” – Trump kundërshton shefen e inteligjencës për kapacitetet bërthamore të Iranit

I pyetur se çfarë mendonte personalisht për sa afër ishte Irani për ta siguruar një armë bërthamore, duke pasur parasysh dëshminë e Gabbard disa muaj më parë, Trump u tha gazetarëve në Air Force One: “Shumë afër”.

Kur u ngacmua mbi dëshminë specifike të Gabbard se Irani nuk ishte afër, Trump tha: “Nuk më intereson çfarë tha ajo. Mendoj se ata ishin shumë afër që ta kishin”.

Gabbard dëshmoi në mars se komuniteti i inteligjencës “vazhdon të vlerësojë se Irani nuk po ndërton një armë bërthamore dhe se udhëheqësi suprem Khamenei nuk ka autorizuar një program armësh bërthamore që e pezulloi në vitin 2003”.

Siç raportoi së fundmi CNN, vlerësimet e inteligjencës amerikane kishin arritur në përfundimin se jo vetëm që Irani nuk ishte duke ndjekur aktivisht një armë bërthamore, por se do t’i duheshin deri në tre vjet për të qenë në gjendje ta prodhonte dhe ta dorëzonte një të tillë në një objektiv të zgjedhur prej tij, sipas katër personave të njohur me vlerësimin.

Por kryeministri izraelit, Benjamin Netanyahu, është në një linjë me Trump dhe ka argumentuar në mënyrë të përsëritur se Irani ishte në prag të sigurimit të një arme bërthamore.

I pyetur të dielën e kaluar në një intervistë nëse kishte ndodhur ndonjë ndryshim nga fundi i marsit deri këtë javë dhe nëse inteligjenca amerikane kishte gabuar, Netanyahu tha: “Inteligjenca që morëm dhe që ndamë me Shtetet e Bashkuara ishte absolutisht e qartë, ishte absolutisht e qartë se ata po punonin, me një plan sekret për ta armatosur uraniumin”.

“Ata po përparonin shumë shpejt”.