Shtetet e Bashkuara do të vendosin një tarifë prej 15% mbi verën evropiane të importuar duke filluar nga 7 gushti, në bazë të një urdhri ekzekutiv të presidentit Donald Trump. Ndërkohë, pijet e forta si whisky, konjaku dhe disa të tjera kanë më shumë gjasa të përjashtohen nga kjo tarifë, falë një marrëveshjeje të vitit 1994 mes SHBA dhe Bashkimit Evropian.
Kjo ndarje ka ngjallur shqetësim të madh në industrinë e verës, sidomos në vendet eksportuese si Italia dhe Franca, pasi eksportet evropiane të verës në SHBA kapin vlerën e mbi 5 miliardë eurove në vit, ndërsa importet nga SHBA në BE arrijnë vetëm rreth 300 milionë euro. Shoqatat e industrisë paralajmërojnë pasoja serioze, jo vetëm për prodhuesit evropianë, por edhe për vetë ekonominë amerikane, që ka ndërtuar një zinxhir të gjerë ekonomik rreth importimit dhe shpërndarjes së verërave evropiane.
Sipas një raporti të Wine America, sektori amerikan i importit të verës evropiane mbështet një aktivitet ekonomik me vlerë mbi 144 miliardë dollarë. Shoqata Italiane e Verës (UIV) vlerëson se vendosja e tarifës mund të shkaktojë një dëm prej rreth 25 miliardë dollarësh për SHBA-në dhe ka sinjale të para për reduktime në punësim nga distributorët amerikanë.
Administrata amerikane e justifikon tarifën me qëllimin për të balancuar deficitin tregtar, duke e parë verën evropiane si një “kërcënim ekonomik”, ndryshe nga pijet e forta që gëzojnë trajtim më të favorshëm për shkak të shkëmbimeve më të balancuara dhe marrëveshjeve ekzistuese. Ndërkohë, ministri italian i Punëve të Jashtme, Antonio Tajani, ka premtuar mbështetje për sektorin dhe po punon që vera të përfshihet në raundin e ardhshëm të negociatave për përjashtim nga tarifat. Deri atëherë, vera evropiane mbetet nën rrezik.
