Një operacion i koordinuar mes autoriteteve të Spanjës dhe Portugalisë ka çuar në sekuestrimin e më shumë se 3.3 tonëve kokainë dhe arrestimin e tre personave të dyshuar si pjesëtarë të një rrjeti ndërkombëtar të trafikut të drogës.
Operacioni u zhvillua më 13 gusht në Costa del Sol dhe në Portugali, pas informacioneve të siguruara dy ditë më herët për një furgon që dyshohej se transportonte drogë nga Portugalia drejt Spanjës.
Hetimet i çuan autoritetet në një pronë në Torremolinos, ndërsa paralelisht u mbajtën nën vëzhgim disa automjete të dyshuara se përdoreshin për transportimin dhe ruajtjen e kokainës.
Një prej automjeteve u ndoq drejt Marbellës dhe më pas u ndalua, ndërsa një person përfundoi në pranga. Kontrollet vijuan edhe në pronën në Torremolinos, ku u sekuestrua një tjetër sasi kokaine dhe një pistoletë e mbushur. Aty u arrestua personi i dytë.
Operacioni u shtri edhe në Portugali, ku Policia Gjyqësore Portugeze lokalizoi furgonin e dyshuar ndërsa po kthehej drejt Spanjës. Drejtuesi i mjetit u arrestua, duke e çuar në tre numrin e personave të ndaluar.
Sipas bilancit të raportuar të operacionit, në total janë sekuestruar më shumë se 3.3 ton kokainë. Krahas lëndës narkotike, autoritetet sekuestruan tre armë, dy automjete dhe rreth 1,100 euro cash.
