Netanyahu paralajmëron Turqinë: Le ta harrojnë..

Duke folur në një konferencë të përbashkët për gazetarë me homologët nga Greqia dhe Qiproja, kryeministri i Izraelit, Benjamin Netanyahu, tha se “ata që fantazojnë se mund t’i rindërtojnë perandoritë dhe sundimin e tyre mbi tokat tona”, “le ta harrojnë” këtë, në një aludim që kuptohej lehtë se ishte referencë ndaj ndikimit turk në rajon.

Duke dhënë komente krahas kryeministrit grek, Kyriakos Mitsotakis, dhe presidentit qipriot, Nikos Christodoulides, Netanyahu tha: “Është e vërtetë se të gjitha vendet tona ishin të pushtuara në të kaluarën nga një varg perandorish”, shkruan gazeta “The Times of Israel”.

“Por përmes guximit e sakrificës, ne e arritëm pavarësinë tonë në kohëra modern. Atyre që fantazojnë se mund t’i rindërtojnë perandoritë e tyre dhe sundimin e tyre mbi tokat tona, u them: Harrojeni. Nuk do të ndodhë. As mos mendoni për këtë” – shtoi kryeministri izraelit.

“Ne jemi të përkushtuar dhe të aftë për ta mbrojtur veten dhe bashkëpunimi ynë e forcon edhe më tej atë kapacitet” – tha më tej Netanyahu.

Samiti trepalësh, i dhjeti i këtij formati mes tri shteteve, vjen pas raportimeve se Greqia, Qiproja dhe Izraeli janë duke e eksploruar themelimin e një force ushtarake për reagim të shpejtë në pjesën lindore të Mesdheut, pas shqetësimit në rritje në Athinë për pozicionin ushtarak në zgjerim të Turqisë.

Netanyahu gjithashtu tha se vendi i tij është i vetëdijshëm se Irani ka zhvilluar ushtrime rishtazi, duke shtuar se aktivitetet bërthamore të Teheranit do t’i diskutojë me presidentin amerikan, Donald Trump.

“Ne jemi duke e ndjekur këtë dhe jemi duke i bërë të gjitha përgatitjet e nevojshme. Dua që t’i përçoj qartazi këtë Iranit: Çfarëdo veprimi kundër Izraelit do të ballafaqohet me një kundërpërgjigje shumë të ashpër” – paralajmëroi ai