Ministria e Jashtme britanike tha se udhëheqësi i opozitës ruse, Alexei Navalny vdiq pasi u helmua me shigetë e cila përmbante toksinë bretkose.
Dy vjet pas vdekjes së Navalnyt në një koloni penale siberiane, Britania dhe aleatët e saj ia kanë hedhur fajin Kremlinit pas analizës së mostrave të materialeve të gjetura në trupin e tij.
Nuk ka asnjë shpjegim të pafajshëm për toksinën, të quajtur epibatidinë, që është gjetur në mostrat e marra nga trupi i Navalnyt, tha Ministria e Jashtmee këtij vendi.
Duke folur nga Konferenca e Sigurisë në Mynih, Sekretarja e Jashtme e Britanisë së Madhe Yvette Cooper tha: “Vetëm qeveria ruse kishte mjetet, motivin dhe mundësinë për të përdorur këtë toksinë vdekjeprurëse kundër Alexei Navalnyt gjatë burgimit të tij në Rusi.”
Cooper u takua me të venë e Navalnyt, Yulia Navalnaya, në konferencë këtë fundjavë.
“Rusia e pa Navalnyn si një kërcënim,” tha Cooper në këtë ngjarje, raporton BBC.
“Duke përdorur këtë formë helmi, shteti rus demonstroi mjetet e neveritshme që ka në dispozicion dhe frikën dërrmuese që ka nga opozita politike”, shtoi ajo.
Mbretërisë së Bashkuar i është bashkuar Suedia, Franca, Holanda dhe Gjermania në akuzimin e Rusisë për helmimin.
Ministria e Jashtme tha se Mbretëria e Bashkuar ka informuar Organizatën për Ndalimin e Armëve Kimike për shkeljen e supozuar të Konventës së Armëve Kimike nga Rusia.