Ministri i Jashtëm i Iranit, Abbas Araghchi, zhvilloi të dielën një bisedë telefonike me homologun e tij pakistanez, Mohammad Ishaq Dar, ndërsa tensionet mes Teheranit dhe Washingtonit u përshkallëzuan.
“Të dy liderët shkëmbyen pikëpamje mbi situatën në zhvillim në rajon”, thuhet në një njoftim të Ministrisë së Punëve të Jashtme të Pakistanit. Ajo shtoi se ata ranë dakord të mbeten në kontakt të ngushtë, shkruan CNN.
Pakistani është një ndërmjetës kyç në negociatat mes SHBA-së dhe Iranit.
Araghchi udhëtoi të shtunën në Muskat për një takim me homologun e tij nga Omani. Sipas një burimi, Omani ka hartuar një propozim për menaxhimin e trafikut në Ngushticën e Hormuzit, një pikë kyçe mosmarrëveshjeje në konflikt.
Ndërmjetësit kanë bërë përpjekje për të ringjallur diplomacinë mes SHBA-së dhe Iranit, ndërsa të dyja palët kanë shkëmbyer sulme gjatë kësaj jave. Liderët e të dy vendeve lëshuan gjithashtu kërcënime publike gjatë fundjavës.
Ndërsa të dielën, kryetari i Parlamentit të Iranit, Mohammad Bagher Ghalibaf, dukej se kërcënoi SHBA-në në rrjetet sociale. Duke publikuar një pjesë të marrëveshjes prej 14 pikash të nënshkruar në qershor, ai shkroi: “Epoka e marrëveshjeve të njëanshme ka MARRË FUND. Ju thamë: mbajeni fjalën ose paguani çmimin”.
