Meloni reagon për postimin e fotos së saj dhe grave të tjera në faqen pornografike: Jam e neveritur

Kryeministrja italiane, Giorgia Meloni, ka reaguar pas lajmit se fotoja e saj dhe e shumë grave të tjera, figura të njohura në Itali, ishin publikuar në faqen pornografike online “Phica.eu”.

Meloni ka thënë se është e neveritur nga publikimi i këtyre fotove dhe bëri thirrje që autorët të identifikohen shpejt dhe “të ndëshkohen me ashpërsinë më të madhe”.

“Jam e neveritur nga ajo që ka ndodhur”, tha Meloni për Corriere della Sera të premten.

“Dua të shpreh solidaritetin dhe mbështetjen time për të gjitha gratë që janë ofenduar, fyer dhe dhunuar. Është zhgënjyese të shikosh se në vitin 2025, ka ende nga ata që e konsiderojnë normale dhe legjitime të shkelin dinjitetin e një gruaje dhe ta shënjestrojnë atë me fyerje seksiste dhe vulgare, duke u fshehur pas anonimitetit ose një tastiere”, vijoi ajo.

Fotot e motrës së Melonit, Arianna, dhe udhëheqëses së opozitës, Elly Schlein, ishin postuar gjithashtu në faqen italiane Phica, e cila kishte më shumë se 700,000 abonentë përpara se menaxherët e saj të mbyllnin të enjten, duke fajësuar përdoruesit për “përdorimin e gabuar të platformës”.

Fotografitë, të shoqëruara me mbishkrime vulgare dhe seksiste, u morën nga llogaritë personale të mediave sociale ose burime publike pa pëlqimin e tyre dhe u ndryshuan për t’u zmadhuar në pjesë të trupit ose për të përshkruar gratë në poza seksuale.

Dhjetëra gra kanë paraqitur ankesa për faqen seksiste Phica dhe platforma të ngjashme që kur skandali u zbulua këtë javë.

Imazhe të manipuluara të grave të njohura në Itali ishin publikuar në “seksionin VIP” të faqes.