I humb durimi Trumpit, i thotë Izraelit të “mbarojë punën” me Hamasin

Tani, optimizmi i Trumpit duket se është zhdukur. Presidenti tërhoqi negociatorët e tij nga bisedimet për armëpushim këtë javë pasi ShBA e konsideroi Hamasin “jo të koordinuar” dhe “që s’vepron me mirëbesim”. Steve Witkoff, i dërguari i Trump në Lindjen e Mesme, tha se po shqyrtonte “mundësi alternative” për të nxjerrë pengjet.

Dhe Trump, në vend që të kërkonte një kthim të menjëhershëm në tryezën e negociatave, sinjalizoi të premten se ishte koha që Izraeli të përshkallëzonte fushatën e tij ushtarake, edhe pse imazhet e fëmijëve të uritur në Gaza çojnë në zemërim global në rritje.

“Mendoj se ata duan të vdesin, dhe kjo është shumë, shumë keq”, tha Trump për Hamasin përpara se të nisej për një udhëtim fundjave në Skoci. “Duhet të arrijë në një pikë ku do të duhet ta përfundosh punën.”

Nëse ndryshimi i qëndrimit të Trumpit është një pasqyrim i vërtetë i dështimit të bisedimeve – apo, siç sugjeruan disa zyrtarë perëndimorë, një hap taktik që synon të tronditë Hamasin dhe të thyejë një bllokim – nuk ishte e qartë, shkruan CNN.

Por fjalët e tij sugjeruan se ai do të bënte pak për të ushtruar presion mbi Izraelin që të tërhiqej nga fushata e tij ushtarake 21-mujore në Gaza, pavarësisht një krize humanitare në rritje që e shtyu një zyrtar të OKB-së këtë javë t’i etiketonte banorët e Gazës si “kufoma në këmbë”.