Marrëdhëniet mes Princit Harry dhe familjes mbretërore britanike vazhdojnë të mbeten të acaruara, ndërsa vizita e tij e fundit në Londër është shoqëruar me një tjetër episod që ka tërhequr vëmendjen e mediave.
Duka i Sussex-it nuk do të akomodohet në Pallatin Buckingham gjatë qëndrimit të tij në kryeqytetin britanik, pavarësisht se kishte pranuar ftesën për të qëndruar në rezidencën mbretërore.
Sipas zëdhënësit të Harry-t, ai kishte konfirmuar gatishmërinë për të pranuar akomodimin, por më pas u informua se nuk ishte më e mundur të organizohej qëndrimi në pallat.
Nga ana tjetër, burime pranë familjes mbretërore pretendojnë se përgjigjja e princit erdhi pas afatit të caktuar, duke e bërë të pamundur për stafin e Pallatit Buckingham të përgatiste akomodimin.
Harry ndodhet në Mbretërinë e Bashkuar për aktivitete që lidhen me Invictus Games, si dhe për një proces gjyqësor ndaj botuesve të gazetave Daily Mail dhe Mail on Sunday . Ai ka udhëtuar i vetëm, pasi Meghan Markle dhe dy fëmijët e tyre nuk e kanë shoqëruar në këtë vizitë.
Ende nuk dihet nëse Meghan dhe fëmijët do t’i bashkohen Harry-t në ditët në vijim, ndërsa raportet mes Dukës së Sussex-it dhe familjes mbretërore vazhdojnë të jenë në qendër të vëmendjes publike.
