Ministri i Shtetit për Pushtetin Vendor, Ervin Demo i pyetur nga mediat pas mbledhjes së qeverisë për sulmin e ri të hakerave iranianë mbi sistemin e Postës Shqiptare, u shpreh se shërbimi vijon normalisht.
Ai theksoi se aktualisht AKSHI dhe ekspertë të Postës Shqiptare po zhvillojnë një analizë të detajuar mbi atë çfarë ka ndodhur, ndërsa theksoi se nuk ka të dhëna për informacione të inkriptuara që mund të jenë të paaksesueshme përpjesën operacionale të vetë institucionit, shkruan rtsh.al.
“Momentin që flasim po zhvillohet një analizë e detajuar nga Autoriteti Kombëtar i Kibernetikës, AKSHI, nga ekspertë të Postës. Të gjitha shërbimet e postës vazhdojnë normalisht. S’ka të dhëna që deri tani që ka informacione të inkriptuara që janë të paaksesueshme për pjesën operacionale të vetë postës. Duhet të presim raportin përfundimtar të ekspertëve për atë që ka ndodhur brenda postës. Vetë AKSHI tashmë ka kapacitetet që rrisin garancinë për integritetin e të dhënave publike në institucionet shqiptare”, deklaroi Demo.
Kujtojmë se dy javë më parë institucioni më i lartë ligjvënës në vend ra pre e një sulmi të sofistikuar kibernetik. Kuvendi i Shqipërisë konfirmoi zyrtarisht se sistemet e tij të teknologjisë së informacionit u goditën nga një akses i paautorizuar, i cili kishte si synim kryesor fshirjen e të dhënave dhe paralizimin e llogarive të punonjësve të administratës.
