Studentët në Seri u bënë thirrje qytetarëve që t’u bashkohen sot në aksionin “Bllokadë totale e Serbisë”, me mesazhin “Nuk do të na shkelni”, për shkak të ndërhyrjeve të dhunshme të policisë në protestat e mëparshme.
Bllokadat në Novi Sad filluan në orën 06:00 të mëngjesit, në Çaçak në orën 6:30 të mëngjesit dhe në Beograd, Nish, Kragujevc dhe Novi Pazar në orën 07:00 të mëngjesit. Bllokada janë paralajmëruar edhe në qytete të tjera të Serbisë.
Presidenti serb Aleksandar Vuçiq u bëri thirrje studentëve të heqin dorë nga bllokada e qyteteve, duke kërkuar “të mos shkatërrohet Serbia” dhe duke thënë se “shteti dëshiron të lejojë të gjithë lirinë e tubimit dhe shprehjes”.
Ai u kërkoi studentëve dhe qytetarëve të braktisin bllokadat e paralajmëruara, duke thënë se shteti nuk dëshiron të reagojë dhe se shmang përdorimin e forcës, por tha se “shteti nuk mund dhe nuk duhet të lejojë këtë lloj dhune, sepse atëherë nuk është më shtet”.
Studentët dhe qytetarët e Serbisë kanë protestuar masivisht në rrugët e shumë qyteteve të vendit që nga e shtuna, duke kërkuar shpalljen e zgjedhjeve të parakohshme, lirimin e të gjithë protestuesve të arrestuar dhe heqjen e kampit të improvizuar në Parkun Pionirski në Beograd, ku po qëndrojnë të ashtuquajturit “studentë që duan të mësojnë” pranë qeverisë së Vuçiqit.
Protestat në Serbi kanë vazhduar, me ndërprerje të herëpashershme, që nga 1 nëntori i vitit të kaluar, kur 16 persona vdiqën në shembjen e një tendë në Stacionin Hekurudhor të Novi Sadit, për të cilën demonstruesit e mbajnë përgjegjës sistemin shtetëror “të korruptuar”.
