Dy ushtarë amerikanë zhduken gjatë stërvitjes “African Lion” në Marok

Dy pjesëtarë të forcave amerikane që po merrnin pjesë në stërvitjet e përbashkëta ushtarake African Lion u raportuan të zhdukur pranë qytetit Tan Tan në jug të Marokut, tha të dielën Komanda Amerikane për Afrikën (AFRICOM) dhe Forcat e Armatosura Mbretërore të Marokut, raporton Reuters.

Forcat amerikane, marokene dhe partnerë të tjerë kanë nisur operacione të koordinuara kërkim-shpëtimi, përfshirë mjete tokësore, ajrore dhe detare, për të gjetur pjesëtarët e forcave që u zhdukën pranë zonës së stërvitjes Cap Draa, thanë të dy ushtritë në deklarata të ndara.

Ushtria marokene tha se pjesëtarët e forcave u zhdukën pranë një shkëmbi.

Incidenti mbetet nën hetim dhe kërkimet po vazhdojnë, shtuan ata.

African Lion është stërvitja më e madhe vjetore e përbashkët e Komandës Amerikane për Afrikën, që synon përmirësimin e ndërveprueshmërisë mes forcave amerikane, aleatëve të NATO-s dhe vendeve partnere afrikane.

Edicioni i këtij viti zhvillohet nga 27 prilli deri më 8 maj në katër vende: Gana, Maroku, Senegali dhe Tunizia.

Pjesa më e madhe e stërvitjeve zhvillohet në Marok me pjesëmarrjen e rreth 5,000 personave nga më shumë se 40 vende, sipas AFRICOM.