Një dron rus ka goditur një tren pasagjerësh në Ukrainën perëndimore, vetëm rreth dy kilometra larg kufirit me Poloninë, pak minuta pasi në të njëjtën linjë hekurudhore kishte kaluar një tren që transportonte ish-kryeministrin britanik Boris Johnson dhe zyrtarë të lartë evropianë.
Sipas BBC, nga sulmi nuk janë raportuar viktima, pasi pasagjerët e trenit ishin evakuuar në kohë, pasi ishte konstatuar kërcënimi. Droni goditi lokomotivën, duke shkaktuar dëme materiale.
Boris Johnson po kthehej nga Kievi, ku kishte marrë pjesë në një konferencë ndërkombëtare. Në të njëjtën rrugë udhëtonin edhe zyrtarë të lartë evropianë të sigurisë, mes tyre Këshilltari Britanik i Sigurisë Kombëtare, Jonathan Powell, si dhe një këshilltar i kancelarit gjerman Friedrich Merz.
Treni që transportonte personalitetet e huaja kishte kaluar në zonën ku ndodhi sulmi vetëm pak minuta përpara goditjes.
Moska deklaroi të dielën se kishte goditur “infrastrukturën hekurudhore” në Ukrainën perëndimore, ndërsa incidenti ka shkaktuar reagime të reja lidhur me sulmet e përsëritura ndaj rrjetit hekurudhor ukrainas.
