Një dramë e pazakontë është zhvilluar të martën në mbrëmje në Serbi, ku një avion i kompanisë Air Serbia, që ishte nisur nga Beogradi drejt Moskës, është detyruar të kthehet në aeroportin “Nikola Tesla”. Sipas raportimeve të mediave serbe, në avion dyshohet se ndodheshin Aleksandar Vulin, njëri nga politikanët më prorusë të Serbisë, drejtori i Srbijagas-it, Dušan Bajatović, dhe politikani Nenad Popović.
E gjithë ngjarja po shoqërohet me dyshime se Vulin po përpiqej të largohej nga Serbia për t’iu shmangur një hetimi të mundshëm penal.
Sipas televizionit N1, i cili citon portalin Nova.rs, avioni Airbus A320, me numër fluturimi JU134, ishte nisur nga Beogradi në orën 18:25, me destinacion Moskën.
Megjithatë, gjatë fluturimit, avioni ka ndryshuar drejtimin dhe është kthyer në Beograd, ku ka aterruar pak para orës 22:00.
Burime të Nova.rs pretendojnë se urdhri për kthimin e avionit është dhënë nga drejtori i sigurisë korporative të aeroportit, për arsye që thuhet se lidhen me sigurinë. Kjo rrethanë nuk është konfirmuar zyrtarisht.
Por ajo që e bën ngjarjen edhe më interesante është se, disa orë përpara nisjes së avionit, kryetari i Partisë Demokratike të Serbisë, Srđan Milivojević, kishte paralajmëruar publikisht një largim të mundshëm të dy zyrtarëve serbë drejt Rusisë.
“Dhe kush po arratiset sonte drejt Moskës, me fluturimin e orës 18:30?”, kishte pyetur ai në rrjetin social X.
Më herët, në një deklaratë për median serbe Naš Portal, Milivojević kishte pretenduar se dy politikanë po udhëtonin drejt Moskës, por me një dallim interesant: njëri kishte blerë biletë vajtje-ardhje, ndërsa tjetri vetëm vajtje.
Sipas tij, politikani që kishte biletë vetëm vajtje ishte ish-ministër, i njohur për qëndrimet kundër integrimit evropian, dhe ndaj tij kishte filluar një hetim.
