Arsyeja e pabuesushme, ja pse Bjellorusia nuk mori pjesë në takimin inaugurues të “Bordit të Paqes”

Bjellorusia nuk mori pjesë në mbledhjen inauguruese të Këshillit të Paqes të presidentit amerikan Donald Trump në Uashington, për shkak se delegacionit të saj nuk iu dhanë vizat e nevojshme hyrëse në SHBA, njoftoi Ministria e Jashtme në Minsk.

Sipas autoriteteve bjelloruse, pavarësisht se ishin përmbushur të gjitha procedurat e kërkuara nga ana e tyre, vizat nuk iu dorëzuan delegacionit në kohë për të marrë pjesë në seancën e parë të organit të ri ndërkombëtar.

Presidenti Alexander Lukashenko ishte ftuar nga homologu i tij amerikan për t’u bashkuar si anëtar themelues i Këshillit, i cili fillimisht u krijua për të mbikëqyrur rindërtimin e Gazës, por që tashmë ka një mision më të gjerë për zgjidhjen e konflikteve në nivel global.

Ministria e Jashtme bjelloruse deklaroi në Telegram se kishte informuar në kohë palën amerikane se ministri i Jashtëm, Maksim Ryzhenkov, do të udhëtonte drejt Uashingtonit për të përfaqësuar vendin në mbledhjen e parë.

“Situata ngre natyrshëm pyetjen: për çfarë paqeje dhe për çfarë lloj bashkimi po flasim, nëse as formalitetet më bazike për pjesëmarrjen tonë nuk u përmbushën nga organizatorët?”, thuhet në reagimin e Minskut.

Mungesa e Bjellorusisë, një aleate e ngushtë e Rusisë, vjen në një moment tensionesh të shtuara gjeopolitike dhe hedh hije mbi fillimin e punimeve të Këshillit të Paqes në kryeqytetin amerikan.