Alexandru Munteanu betohet si kryeministër i Moldavisë

Alexandru Munteanu u betua si kryeministër i Moldavisë të shtunën gjatë një ceremonie ku morën pjesë Presidentja Maia Sandu dhe kryetari i parlamentit, Igor Grosu.

Munteanu, një ekonomist 61-vjeçar i cili ka punuar në Bankën Botërore dhe Bankën Kombëtare të Moldavisë, merr një detyrë politike për herë të parë, me qëllim të udhëheqë përpjekjet e vendit për anëtarësim në Bashkimin Evropian, raporton “Politico”.

Parlamenti i Moldavisë e emëroi Munteanun si kryeministër të premten, pas fitoreve vendimtare të Partisë së Veprimit dhe Solidaritetit (PAS) të Sandusë në zgjedhjet e shtatorit ndaj rivalëve pro-rusë.

“Kemi një mundësi unike për t’u bërë qeveria që do ta çojë Moldavinë në Bashkimin Evropian”, tha Munteanu të premten para votës së besimit. Kryeministri i sapozgjedhur mori mbështetjen e 55 prej 101 deputetëve.