Arrestimet e fundit, MPJD i bën thirrje qytetarëve të shmangin kalimin nëpër Serbi

Ministria e Punëve të Jashtme dhe Diasporës ka reaguar sërish duke iu bërë thirrje qytetarëve të Kosovës që të shmangin kalimin përmes pikëkalimeve kufitare me Serbinë pas arrestimit të ish-policit të Kosovës, Arbnor Spahiu.

MPJD tha se shpreh shqetësimin e thellë lidhur me intensifikimin e rasteve të ndalimeve dhe arrestimeve arbitrare të qytetarëve të Republikës së Kosovës nga autoritetet e Serbisë.

“Në këto rrethana, MPJD u bën thirrje të gjithë qytetarëve të Republikës së Kosovës, përfshirë ata që jetojnë në mërgatë dhe planifikojnë të udhëtojnë drejt Kosovës, që të shmangin kalimin përmes pikëkalimeve kufitare me Serbinë dhe në të njëjtën kohë, inkurajohen të gjithë qytetarët që të përdorin pika të tjera kufitare për kalimin e tyre”.

Ministria e Jashtme tha se rasti me Spahiun është dëshmi për praktikat destruktive.

“Rasti i fundit i ndalimit të ish-punonjësit të Policisë së Kosovës, z. Spahiu në pikën kufitare ndërmjet Serbisë dhe Hungarisë është dëshmi e mëtejme e praktikave të papranueshme dhe destruktive të Serbisë, që bien në kundërshtim me të drejtën ndërkombëtare dhe me standardet bazë për mbrojtjen e të drejtave të njeriut”.

Ministria e Punëve të Jashtme dhe Diasporës përsëriti se “është duke e ndjekur nga afër situatën dhe mbetet në komunikim të vazhdueshëm me institucionet vendore dhe partnerët ndërkombëtarë, me qëllim të adresimit të këtyre shkeljeve sistematike dhe garantimit të të drejtave dhe sigurisë së qytetarëve të Republikës së Kosovës”.