Ministrja Rizvanolli: Duhet shumë punë për izolimin e shtëpive

Ministrja e Ekonomisë, Artane Rizvanolli ka folur për idenë që para disa ditësh ua dha qytetarëve, që t’i izolojnë shtëpitë pasi po i pret një dimër i vështirë.

Rizvanolli në Tëvë1 ka deklaruar se kanë parë mundësitë për të subvencionuar pjesërisht izolimin e shtëpive, megjithatë, la të kuptohet se për këtë duhet punë.

“Këtë vit do të shohim mundësitë për të subvencionuar materialet ose ndonjë formë të pjesshme që kontribuon në izolimin e shtëpive, por duhet të kemi parasysh që kur po flasim për izolim, po flasim për projekt që u paraprin auditimi energjetik, planifikimi e realizimi i ndërhyrjeve, mbikqyrja e cilësisë së punëve, të gjitha këto duan kohë dhe ekspertizë të cilën institucionet tona nuk e kanë të zhvilluar dhe kapacitetet i kanë të kufizuara”, tha ajo.

Tutje, Rizvanolli shtoi se kjo çështje do të jetë prioritet për vitin tjetër.

“Gjatë këtij viti, gjithashtu, projekti i MCC ka pilotuar për herë të parë këto investime në izolim, në sektorin private. Janë nxjerrë disa mësime, disa prej tyre janë përdorur edhe në masat që i lansuam sot, dhe pasi i kemi konsideruar mundësitë për ndonjë masë të shpejtë sa i përket izolimit, rreziku ka qenë tejet i lartë për të bërë diçka të përshpejtuar, por kjo është prioritet për vitin tjetër”, shtoi ministrja e Ekonomisë.