Platforma qytetare “Liria Ka Emër” do të organizojë të shtunën, më 12 shtator, “Marshin për Liri” në Prishtinë, në prag të shpalljes së aktgjykimit ndaj ish-krerëve të Ushtrisë Çlirimtare të Kosovës në Hagë.
Marshi do të nisë në orën 14:00 nga sheshi “Skënderbeu” dhe, sipas organizatorëve, pritet të jetë një prej organizimeve më të mëdha të platformës deri më tani.
Pjesë e programit do të jenë edhe performancat muzikore të këngëtarëve të njohur, Arif Vladi dhe Shkurte Fejza, të cilët prej vitesh njihen për repertorin e tyre me këngë patriotike dhe kushtuar luftës për liri.
Organizatorët Ismail Tasholli dhe Eliza Hoxha kanë paralajmëruar një program të veçantë për pjesëmarrësit, ndërsa marshi mbahet katër ditë para datës 16 shtator, kur pritet të shpallet aktgjykimi ndaj Hashim Thaçit, Kadri Veselit, Jakup Krasniqit dhe Rexhep Selimit.
Platforma “Liria Ka Emër” ka deklaruar se përmes këtij organizimi synon të përcjellë mesazhin për drejtësi, dinjitet dhe mbështetje ndaj ish-krerëve të UÇK-së.
Marshi i 12 shtatorit pritet të shoqërohet me pjesëmarrje të gjerë qytetare, ndërsa organizatorët kanë bërë thirrje që qytetarët t’i bashkohen aktivitetit në sheshin “Skënderbeu”.
