E mbajti fshehur, zbulohen detaje për projektin e ri të Romeo Veshajt

X Media, projekti i ri i Romeo Veshajt, i konceptuar si platformë digjitale dhe radiofonike, pritet të prezantohet së shpejti. Ndërkohë, Anabel ka siguruar informacione mbi këtë nismë mediatike.

Sipas burimeve të sigurta, X-Media është menduar si një media multifunksionale, që do të operojë paralelisht në disa kanale: aplikacion, website, rrjete sociale dhe radio, duke synuar një qasje moderne ndaj përmbajtjes mediatike.

Platforma parashikohej të niste transmetimet më 8 dhjetor, por deri më sot, 3 shkurt 2026, asgjë nuk ka nisur zyrtarisht, ndonëse publiku është ngacmuar vazhdimisht me sinjale. Së fundmi, u prezantua edhe një klip që njoftonte rikthimin e dyshes Mateo dhe Rudi, dikur prezantues në MAD TV, në një program të përbashkët.

Sipas burimeve tona, X-Media do të ketë një studio të dedikuar, ku do të përfshihen gazetarë të njohur, ndërsa vetë Romeo do të ketë rol aktiv si prezantues. Programacioni i planifikuar përfshinte një gamë të gjerë emisionesh, si: emision mëngjesi nga e hëna në të premte, edicion të përditshëm lajmesh, emisione javore dhe formate “late night”, evente në YouTube me artistë të njohur, emision satiro-komik.

Të paktën këto kanë qenë synimet fillestare të projektit, ndërsa aktualisht nuk dihet saktësisht se sa prej tyre janë realizuar dhe në cilën fazë ndodhet X Media.

Për momentin, nuk ka ende një njoftim zyrtar publik për nisjen e platformës, por burimet sugjerojnë se prezantimi i saj nuk duket i largët.