Lumir Abdixhiku mobilizon strukturat e tij në Prishtinë: Koha jonë po vjen

“Koha jonë po vjen”, ka paralajmëruar kryetari i Lidhjes Demokratike të Kosovës (LDK), Lumir Abdixhiku, teksa të mërkurën ka mbledhur strukturat partiake në Prishtinë.

“Pesë degë, një rrugë, një qëllim”, ka nisur përshkrimin e këtij mobilizimi Abdixhiku, duke thënë se “rritjet e LDK-së”, i vënë kundërshtaret përballë.

“Sonte, thirra në takim strukturat udhëheqëse të 5 degëve. U bëmë bashkë si përgjigje ndaj thirrjes për organizim të gjerë partiak; si domosdoshmëri e zgjerimit të aktivitetit në terren në këtë vit të rëndësishëm zgjedhor nacional. Takova Kryesitë e Degëve, Kryetarët e Nëndegëve, Deputetët e Kuvendit të Kosovës me bazë në Kryeqytet. Takova një ekip të shkëlqyeshëm, profesionistë të vërtetë, politikanë të pastër e të ndershëm, aktivistë me plot vullnet për të lënë një shenjë. Me të tillë, njeriu mburret të ndajë një rrugëtim bashkë”, ka shkruar Abdixhiku në Facebook.

“Natyrisht, përbashkimi ynë, rritjet tona, punët e mbara që i bëjmë, na i vënë kundërshtarët përballë. Aty bëhen të gjithë bashkë kundër nesh; sikurse tash, sikurse bëheshin gjithherë. Aty provojnë besimin e votuesve të Kryeqytetit për LDK-në, ta rrëmbejnë në tavolinë. Çfarë s’kuptojnë është se koha e një politike të tillë ka marrë fund! Nuk do t’i lëmë ta bëjnë këtë politikë model në Prishtinë”.

Kreu i LDK-së, parti politike që qeverisë me Prishtinën ka shtuar se “Prishtina dhe Lidhja Demokratike kanë rigjetur veten”.

“Tani është koha që këtë lidhje ta forcojmë në gjithë vendin”, ka shtuar Abdixhiku.

Më tutje, ai kishte kritika edhe ndaj Qeverisë së Albin Kurtit, duke thënë se Kosova nuk duhet të mbetet “peng kolektiv” që Abdixhiku e quan si “çmenduri politike populiste”.

“Prandaj, përgjatë gjithë vitit do të jemi në terren. Në çdo lagje, në çdo hyrje, në çdo shtëpi të Prishtinës. Të flasim zëshëm, bindshëm, dhe me mburrje se formacioni i vetëm pavarësist në vend, është adresa e vetme e normalitetit dhe zhvillmit. Se ky vend, s’duhet të jetë peng kolektiv i një çmendurie politike popullsite që nxitë vetëm frikë, zymtësi e tension. Ne kemi nevojë për zhvillim. Kemi nevojë për maturi. Kemi nevojë për rrugëtim euroatlantik. Kosova ka nevojë për “Rrugën e Re”- programin më ambicioz politik në vend. Në momente kritike politike, aktivizimi ynë politik bëhet domosdoshmëri. Në momente kritike politike, mbështetja për LDK-në është domosdoshmëri”, ka thënë Abdixhiku