Zyrtari i NATO-s thotë se e ndien që po e hapin një kapitull të ri të raporteve me Serbinë

Zëvendësndihmës Sekretar i Përgjithshëm për Partneritete në NATO, ambasadorin Kevin Hamilton, gjatë qëndrimit në Beograd tha se “aleanca është e përkushtuar ndaj një partneriteti me Serbinë” dhe e përshkroi stërvitjen e parë të përbashkët ushtarake me Forcat e Armatosura Serbe si fillimin e një kapitulli të ri në marrëdhëniet midis dy palëve.

Hamilton tha në një intervistë me agjencinë e lajmeve Beta se aleanca dëshiron të ketë një marrëdhënie me Serbinë “që shkon aq larg sa dëshiron Serbia” dhe se “nuk kërkon asgjë” nga Beogradi.

“Ndjejmë se po hyjmë në një kapitull të ri në marrëdhënien tonë. Ne, si NATO, i kemi drejtuar Serbinë në një përpjekje për të thelluar marrëdhënien tonë dhe mendoj se përgjigjja deri më tani ka qenë e ngrohtë dhe reciproke. Ky është toni dhe drejtimi i marrëdhënies që ne do të donim të vazhdonim”, tha ai.

“Mendoj se jemi në një pozicion të mirë. Ne flasim vazhdimisht me Serbinë për shpresën dhe pritjet tona që Serbia të jetë një forcë për stabilitet dhe të dërgojë mesazhe pozitive në të gjithë Ballkanin Perëndimor. Serbia është vendi më i madh dhe ndoshta më me ndikim në këtë rajon të Europës, dhe kjo është arsyeja pse ne mbështetemi te Serbia si një partner që përpiqet për siguri dhe stabilitet së bashku me NATO-n”, shtoi Hamilton.

I pyetur për narrativën anti-NATO që ekziseton te publiku serb, Hamilton tha se aleanca nuk mund të kontrollojë atë që individët në elitën politike ose në media do të thonë për NATO-n, por se ajo mund të veprojë vetëm në një mënyrë që tregon se është e përkushtuar ndaj një partneriteti me Serbinë.

“Ne jemi sigurisht të përkushtuar ndaj një partneriteti dhe sigurisht shpresojmë për një reduktim të retorikës anti-NATO në Serbi dhe në këtë rajon, por në fund të fundit nuk mund ta kontrollojmë këtë, përveçse për të treguar se ne me të vërtetë duam të kemi një marrëdhënie me Serbinë që bazohet në transparencë, respekt të ndërsjellë dhe besim”, tha Hamilton, i cili foli me zyrtarët serbë në Beograd.

Hamilton gjithashtu theksoi se është e rëndësishme që Serbia të jetë “shumë transparente” me fqinjët e saj kur bëhet fjalë për blerjet e armëve dhe modernizimin e forcave të saj të armatosura.

Kur u pyet për të dhënat e fundit që tregojnë se Serbia po blen shumicën e armëve të saj nga Kina, Hamilton tha se ata janë “shumë të vetëdijshëm” për faktin se Serbia ndjek një politikë neutraliteti ushtarak dhe një politikë të jashtme shumëvektoriale, dhe se për këtë arsye ka marrëdhënie që janë të ndryshme nga ato me NATO-n ose anëtarët e saj.

“Nuk mund të komentoj për blerjen specifike të armëve, përveçse të them se është e rëndësishme që Serbia të jetë shumë transparente me fqinjët e saj, pavarësisht nëse janë në NATO apo jo, kur bëhet fjalë për qëllimet e saj në lidhje me blerjet e armëve dhe si po modernizon forcat e saj të armatosura dhe për çfarë qëllimi. Mendoj se nuk është aq e rëndësishme vetëm të kesh armë, por transparencë dhe dialog midis Serbisë dhe fqinjëve të saj, i cili në thelbin e tij dhe si qëllim ka stabilitetin, sigurinë dhe transparencën”, tha ai.

“Sot, këtë javë dhe javën e kaluar, kemi stërvitjen NATO-Serbi në poligonin e stërvitjes Borovac pranë Bujanocit, ku forcat e NATO-s dhe ato serbe po mësojnë nga njëra-tjetra në aspektin e operacioneve të mbështetjes së paqes. Është një mundësi për forcat e armatosura serbe që të përmirësojnë aftësitë e tyre kur bëhet fjalë për vendosjen në operacione të mbështetjes së paqes jashtë vendit, nën një mandat të OKB-së ose BE-së”, shtoi ai.

Ndërkaq për Kosovën, Hamilton tha se shqetësimi i aleancës është të sigurojë që misioni KFOR, në përputhje me mandatin e marrë nga Kombet e Bashkuara, “të jetë aty për të garantuar sigurinë dhe mirëqenien e të gjithë popujve, të gjitha komuniteteve të Kosovës”.