Protesta e organizuar në kryeqytetin shqiptar kundër projektit turistik në Zvërnec është shoqëruar me tensione dhe përplasje mes qytetarëve dhe forcave të policisë.
Gjatë marshimit, protestuesit kanë tentuar të kalojnë kordonin e vendosur nga policia, duke shkaktuar momente tensioni në qendër të Tiranës. Në pamjet e publikuara nga vendi i ngjarjes shihet se një pjesë e protestuesve kanë arritur të çajnë kordonin policor, ndërsa efektivët kanë ndërhyrë për të rikthyer kontrollin e situatës.
Protesta është thirrur nga aktivistë dhe përfaqësues të shoqërisë civile, të cilët kundërshtojnë ndërtimin e resortit në Zvërnec dhe kërkojnë ndalimin e projektit. Tubimi vjen pas tensioneve të ditëve të fundit lidhur me zhvillimet në zonën bregdetare të Vlorës.