Në fshatin Shkozë të Komunës së Prizrenit, pas reshjeve të dendura të shiut dhe ndryshimeve të papritura atmosferike, një zjarr ka përfshirë një stallë bagëtish.
Dyshohet se zjarri ka shkaktuar dëme të konsiderueshme materiale.
Sipas asamblistit të zgjedhur të PDK-së, Tefik Tarashaj stalla dhe sasia e ushqimit për bagëtitë janë djegur tërësisht, ndërsa fatmirësisht nuk raportohet për të lënduar.
Ai ka bërë të ditur se ekipet e Zjarrfikësve kanë reaguar menjëherë, duke arritur të lokalizojnë dhe shuajnë zjarrin, si dhe të parandalojnë përhapjen e tij në objektet përreth.
Tarashaj, ka kërkuar nga institucionet kompetente që të ofrojnë mbështetje urgjente për familjen e prekur nga kjo fatkeqësi, me theks të veçantë sigurimin e ushqimit për bagëtitë dhe minimizimin e dëmeve, sidomos në këtë periudhë të ftohtë dimri.
