Vrasja në Llapashticë të Podujevës, Policia arreston 31-vjeçarin e dyshuar

Policia e Kosovës ka arrestuar sot në Prishtinë një person që ishte në kërkim për vrasjen e ndodhur më 6 shtator 2025 në fshatin Llapashticë e Epërme të Podujevës.

Sipas njoftimit të Policisë, operacioni është realizuar nga zyrtarët e Stacionit Policor Veriu të Drejtorisë së Policisë së Kryeqytetit, të cilët kanë lokalizuar dhe ndaluar personin e dyshuar.

I arrestuari është identifikuar me inicialet A.H., mashkull 31-vjeçar, shtetas i Republikës së Kosovës, i cili ishte shpallur në kërkim për përfshirje në veprën penale të vrasjes.

Policia ka bërë të ditur se veprimet e mëtejme ndaj të dyshuarit do të ndërmerren në koordinim me Prokurorin e Shtetit.