Vodhën kutitë e bamirësisë në lokale në Obiliq, arrestohen dy të dyshuarit nga Plemetini

Dy persona kanë përfunduar në prangat e Policisë pasi dyshohen se vodhën kutitë me para të dedikuara për bamirësi në dy lokale të ndryshme në Obiliq.

Vjedhjet raportohet se kanë ndodhur në periudha të ndryshme, respektivisht më 16 dhe 23 maj, në rrugët “Adem Jashari” dhe “Isa Boletini” në Obiliq.

Sipas informatave, personat e dyshuar kishin arritur të marrin arkat me para të dedikuara për ndihmë humanitare, ku vlera totale e mjeteve të vjedhura dyshohet të jetë rreth 350 euro.

Pas veprimeve intensive hetimore nga njësia e hetimeve të Stacionit Policor në Obiliq, më 25 maj janë identifikuar dhe arrestuar dy të dyshuarit: Haxhi Maka nga Plemetini dhe Adnan Berisha, po ashtu nga Plemetini.

Sinjali mëson se të dy janë intervistuar në prani të avokatëve mbrojtës.

Me vendim të Prokurorit të Shtetit, të dyshuarit janë dërguar në Qendrën e Mbajtjes në Prishtinë për 48 orë.