Veterani i UÇK-së Dardan Krasniqi kritikon Osmanin dhe Kurtin për mungesë vlerësimi ndaj veteranëve të UÇK-së – “për estradë kujtohen t’i nderojnë”

Veterani i Ushtrisë Çlirimtare të Kosovës, Dardan Krasniqi, ka reaguar publikisht duke kritikuar Presidenten Vjosa Osmani dhe Kryeministrin Albin Kurti për, siç thotë ai, mungesë vlerësimi institucional ndaj veteranëve të luftës.

Sipas Krasniqit, për festat shtetërore janë ndarë mirënjohje për figura të estradës, ndërsa veteranët e UÇK-së janë anashkaluar. Ai përmendi rastin e 28 Nëntorit, kur Presidentja Osmani ndau mirënjohje për këngëtaren Adelina Ismajli, si dhe 28 Dhjetorin, kur Kryeministri Kurti ndau mirënjohje për këngëtaren Dafina Zeqiri.

Krasniqi thekson se kontributi i secilit qytetar duhet vlerësuar, por ngre pyetjen pse nuk është nderuar asnjë veteran apo veterane e UÇK-së. Ai shtoi se edhe në Ditën e Veteranit të UÇK-së, përkundër deklaratave simbolike, sipas tij nuk pati asnjë gjest konkret nderimi, as qoftë një buqetë lulesh për veteranët.

Në reagimin e tij, Krasniqi shpreh pakënaqësi duke thënë se veteranët ndihen të lodhur nga përdorimi i vazhdueshëm i luftës vetëm në fjalë, pa respekt dhe vlerësim real institucional.