Vasfije Krasniqi: Kisha shumë dilemë a mund të flas publikisht për dhunën e përjetuar

E mbijetuara e dhunës seksuale gjatë luftës në Kosovë, Vasfije Krasniqi-Goodman, e cila 7 vjet më parë ka folur publikisht për dhunën seksuale që ka përjetuar gjatë luftës, ka theksuar se një ditë para se të fliste publikisht kishte dilema se a mund të fliste apo jo.

“Ka qenë shumë e vështirë edhe sot është shumë e vështirë dhe kam pasur shumë pikëpyetje se a mund të ja dalë”, ka deklaruar ajo, në shënimin e 26 vjetorit të themelimit të Qendrës Kosovare për Rehabilitimin e të Mbijetuarve të Torturës (QKRMT).

Drejtuesja e QKRMT-së, Feride Rushiti, ka theksuar se Krasniqi-Goodman ishte ajo që e theu heshtjen dhe u dha zë këtyre përjetimeve.

“Në këto 26 vjet nuk po shënojmë vetëm rrugëtimin e historisë, por edhe drejtësi të fituara. Kur e nisëm rrugëtimin në vitin 1999, para vetes kishim plagë të thella. Atë botë nuk ekzistonte një sistem i atillë në përgjigje të këtyre plagëve të thella. Dhe kështu nisi misioni jonë, të rindërtojmë jetë dhe të rikthejmë dinjitetin atje ku ishte rrënuar. Ky mision kishte rëndësi të veçantë për t’i dhënë dritë”, ka deklaruar ajo.

Edhe Ramadan Nishori, burri i parë i cili gjatë këtij viti foli publikisht për dhunën seksuale të përjetuar gjatë luftës, tha se “forca dhe guximi ynë është Vasfija”.

“Kam menduar se unë çka kam kaluar para se me ardhur në organizatë te ju, në sa sfida kam kaluar unë edhe jam dalë edhe kam menduar që ka edhe shumë të mbijetuar të tjerë të cilët janë duke kaluar nëpër atë rrugë qe kam kaluar. Më lejoni të përshëndes heroinën tonë të gjallë, se kjo është, Vasfija është forca dhe guximi jonë unë e kam marrë forcën dhe guximin prej Vasfijes”, ka deklaruar Nishori.

Ndërkohë, psikologia klinike në QKRMT, Selvi Izeti ka folur për afatin kohor për njohjen e statusit të viktimave të dhunës seksuale.

“Kur ne vendosim afatin për të njohur dhimbjen, si mund të njihet me afat kohor. A mund të ju themi ne të dhunuarve qe drejtësia është me afat të caktuar. Kemi të bëjmë me dhunime seksuale, ata kur të jenë gati mund të shpalosin dhimbjen e tyre”, ka thënë ajo.

Bazuar në të dhëna të organizatave të shoqërisë civile, gjatë luftës së viteve 1998-1999 në Kosovë janë evidentuar rreth 20 mijë viktima të dhunës seksuale. Mbi 1 mijë e 700 personave tashmë u është njohur statusi i të mbijetuarve.