Disa qytete kanë barazuar ose thyer rekordet për numrin e ditëve radhazi me temperatura mbi 30°C
Vala e të nxehtit që ka përfshirë Zvicrën ka vendosur rekorde të reja jo vetëm për temperaturat e larta, por edhe për kohëzgjatjen e saj.
Sipas të dhënave të publikuara nga MeteoSwiss, stacionet meteorologjike në Cyrih (Fluntern), Schaffhausen, Delémont, Fribourg dhe Altdorf kanë barazuar rekordet historike për numrin e ditëve radhazi me temperatura mbi 30 gradë Celsius, ndërsa nëse temperaturat mbeten të larta edhe të hënën, këto rekorde do të thyhen, transmeton albinfo.ch.
Ndërkohë, St. Gallen ka vendosur tashmë një rekord të ri, duke kaluar nga tre në pesë ditë radhazi me temperatura mbi 30°C – periudha më e gjatë e vapës e regjistruar ndonjëherë në këtë qytet.
Fundjava solli edhe temperatura rekord në nivel kombëtar. Në Basel/Binningen dhe Beznau u matën deri në 39°C, duke shënuar temperaturën më të lartë të regjistruar ndonjëherë në Zvicër gjatë muajit qershor.
Megjithatë, meteorologët parashikojnë se duke filluar nga kjo javë temperaturat do të bien ndjeshëm në shumicën e rajoneve, ndërsa reshjet dhe stuhitë pritet t’i japin fund valës ekstreme të të nxehtit që ka dominuar vendin gjatë javëve të fundit.
