Trupat e dy alpinistëve të zhdukur për dekada të tëra u gjetën pas shkrirjes së akullnajës zvicerane

Dy alpinistë belgë, të cilët ishin shpallur të zhdukur në Alpet zvicerane në vitin 1992, janë gjetur të vdekur pas shkrirjes së një akullnaje. Trupat e tyre u zbuluan më 26 korrik nga një alpinist në akullnajën Trift, në jug të qytetit zviceran të Lucernës.

Analizat e ADN-së konfirmuan se bëhej fjalë për dy alpinistët, të moshës 39 dhe 41 vjeç kur u zhdukën, pranë malit Weissmies. Pas zbulimit, autoritetet organizuan operacionin e nxjerrjes së trupave dhe i dërguan në një spital në Sion për identifikim.

Shkrirja e akullnajave në Zvicër është përshpejtuar ndjeshëm vitet e fundit. Sipas të dhënave të monitorimit të akullnajave në Zvicër, akullnajat e vendit u tkurrën me rreth një të katërtën gjatë dekadës deri në vitin 2025.

Policia zvicerane tha se ky nuk është rasti i parë kur shkrirja e akullnajave nxjerr në sipërfaqe mbetjet e personave të zhdukur prej dekadash. Në vitin 2023, në një akullnajë pranë Matterhornit u gjetën mbetje njerëzore, të cilat u identifikuan si të një alpinisti gjerman të zhdukur që nga viti 1986.

Shkencëtarët e lidhin tërheqjen e shpejtë të akullnajave me ndryshimet klimatike dhe rritjen e temperaturave globale. Zvicra është ndër vendet ku shkrirja është veçanërisht e theksuar, duke ndikuar edhe në zonat turistike dhe resortet e skive, shkruan BBC.